1914/2024-2025

2024 Mimkut thla ni 5: District Health Society, Lunglei hma lakna Healthy Lunglei District Campaign hnuaiah vawiin khan Public Health Engineering Department (PHED), Lungleia thawktute tan natna inkai chhawn theih loh, Non-Communicable Disease (NCD) chungchang inzirtirna leh an hriselna dinhmun enfiahna (NCD awareness campaign & screening) buatsaih a ni.

PHED Conference Hall, Lungleia NCD awareness campaign & screening buatsaih hi PHED Lunglei Circle-a Superintending Engineer Er Zohmingliana chuan kaihruaiin, tun laiah thih thut thut a tam avangin mahni hriselna dinhmun hriat chian leh ngaih pawimawh a ṭul hle a ni, a ti a. PHE Department-a thawktute puala DC Office leh Health Department te'n inzirtirna leh hriselna enfiahna hun an buatsaihsak chu lawmawm a tih thu leh thawktute'n an ṭangkaipui ngei a beisei thu a sawi.

He hun hmanpuitu Lunglei Additional Deputy Commissioner Pu James Miahlung chuan Healthy Lunglei District Campaign chu kumin June ni 12 khan Health Minister Pi Lalrinpuii'n a hawn thu leh hemi aṭang hian a theih ang anga DC Office leh Health Department ṭang kawpa hma lak chhunzawm zel a nih thu sawiin, kohhran ṭhalai pawl leh NGO bakah, sawrkar department ṭhenkhatah te hma lakna kalpui a ni tawh tih a sawi a. NCD hian Mizoram min run nasa tawh a, taksa insawizawi kan thlahdah vang leh taksa hriselna kawnga kan inthlahdah vangin BP sang, zunthlum leh natna dang nei kan tam em em a ni tiin, hemi laka Lunglei District a fihlim theih nan hian Healthy Lunglei District Campaign hnuaiah NCD awareness campaign & screening chu kalpui ṭhin a nih thu a sawi.

He hunah hian Civil Hospital Lungleia Medical Officer Dr Lalhlimpuii chuan NCD awmzia sawi fiahin, NCD natna lan chhuah dan leh natna lo awm chhan bakah, heti ang natna laka inven dan tur kawng hrang hrangte a zirtir a. NCD (Non-Communicable Disease) chu natna inkai chhawn theih loh ni mah se, inthlah chhawn theih a nih avangin a veite kan inhriat chhuah meuh chuan taksaah pawi thui tak a lo khawih hman tawh ṭhin a, hei vang hian engtin nge kan inven ang tih inzirtir a ṭul a ni, a ti a. India ramah kum 2020 hnu lamah chuan NCD natna hi mi pahnih zelah pakhatin an vei anga chhut a ni tiin, hei vang hian mi zawng zawng deuhthawin natna inkai chhawn theih loh, inthlah chhawn theih si - BP sang, zunthlum leh thluaka thisen zam chat (stroke) hi kan vei anga ngaih a ni, a ti a. Zunthlum chu natna inenkawl hautak tak a nih avang leh inenkawl ṭhat loh chuan stroke a ken tel avangin zunthlum neih leh neih loh inenfiah ngun a ṭul thu a sawi a. Hei bakah hian tun laiah lungphu chawl thut (heart attack) a tam hle tih sawiin, heart attack neite chu lu hai leh thaw hahin an awm thut ṭhin a, heti anga an awm chuan rang taka damdawi in panpui tur a ni a, damdawi in thlenpui ran an nih chuan chhan hman an ni thei a ni, a ti a. NCD laka him tur chuan taksa sawizawi ṭhat leh ei leh ina insum a pawimawh tih a sawi bawk.

NCD chungchang inzirtir bakah hian zawhna leh chhanna hun hman a ni bawk a. Hemi hnu hian he huna telte hriselna dinhmun chu Health Department-a thawktute'n an enfiahsak nghal a ni.