Nimin chawhnu khan Chief Secretary Pi L Tochhong hovin United Nations hnuaia Food & Agriculture Organization (FAO) India Representative, Dr. Peter Kenmore; NLUP Implementing Board hotu te; NLUP Line Department leh Department dang hotulu leh aiawh te chuan Chief Secretary Conference Room-ah meeting an nei.

Chief Secretary chuan meeting pawimawh dante sawiin FAO aiawh chu Mizoram a rawn tlawh theih avangin lawmthu a hrilh a, kawng hranga FAO leh UN Agencies dangten Mizoram an puih thei dan kawng dap pui turin a sawm nghal bawk.

Pu P. L. Thanga, IAS (Retd), Vice Chairman NLUP Implementing Board chuan FAO, UNIDO, IFAC leh UN Agencies dangte nen thawhhona zawn mek a nih thusawiin FAO aiawh leh amah tawiawmtu te field visit an neih pui chuan hma lak dan tur leh thawhhona tha neih dan tur kawng thui tak a in hril theih thu meeting ah hian a sawi. Vawk natna PRRS in Mizoram a tih buai dan te leh khawthlang lamah serthlum kung nasa taka natna in a suat te sawilangin hemi lamah FAO thiamna leh puihna te a ngen bawk a ni.

Dr. Peter Kenmore chuan Planning Commission-in tunhnaia UN Agencies te chu nasa zawka hmarchhak atan hna thawk tura ngen leh hemi atana sector ngaihpawimawh bik nei tura a ngen chuan hmasawnna kawngah a bikin ei leh bar lamah nasa zawka rah tha a chhuah a beisei thu a sawi. FAO chuan ei leh bar a ngaipawimawh rualin tui leh tui hna te, lei luangral te chu a ngai pawimawh a chuvangin agriculture lamah chuan heng te hi dah pawimawh a, hma lak thiam a tul thu a sawi. Mau chungchang sawiin Mizoram chuan mau nursery a neih tha a, amaherawh chu value addition leh marketing lamah hmalak a tul a, hemi atan hian UNIDO leh IBAR te dawr a pawimawh a ni a ti. Delhi a chhuk thlak hunah Sawrkar Laipui Ministry te hnenah thu thlen a, thawhhona nei dan tur a sawipui tur thu a sawi a, FAO chuan Mizoramah January 2014 ah chuan a taka hmalak an duh thu a sawi tel bawk.