Zanin khan Tourist Lodge, Chaltlangah NLUP kalpui dan thlithlai tura Mizoram rawn tlawhtu, United Nations hnuaia Food and Agriculture Organisation (FAO) India Representative, Dr. Peter E. Kenmore leh a team-te pualin Cultural Evening-cum-Dinner Programme hman a ni.

He hunah hian Pu P.L.Thanga, Member & Secretary, State Planning Board leh Vice Chairman, NLUP Implementing Board chuan inlawmna thu a sawi a, thusawitu dang, Dr. Peter E. Kenmore chuan Mizoram nuam a tih thu leh Mizo mipuite lo dawnsawn danah lawmthu  sawiin, Mizo hnam ziarang tilang thei, hnam lam leh zai te chu ngaihthlak manhla a tih thu a sawi bawk.

He hunah hian Ramthar North Branch YMA chuan Mizo hnam lam hrang hrang- Khuallam, Sarlamkai, Chheihlam leh Cheraw-te an entir bakah, zaithiam K.C. Runremsangi leh V.L.Neihthangi te hnen atangin zai mawi tak ngaihthlak a ni bawk. He hun hi Pu Rosiama Vanchhawng, Addl. PCCF, Environment & Forest Department chuan lawmthu sawiin a khar a ni.