No.5556/2020-2021

Aizawl, the 29th September 2020 : Vawiin khan Chief Secretary Pu Lalnunmawia Chuaungo leh Addl. Chief Secretary Pu JC Ramthanga hovin Chief Secretary Conference Room MINECO ah Global Middas Group-in Mizoram Sawrkara hmasawnna leh investment atana proposal pahnih – Mega Film City leh Super Speciality Hospital an thehluh chungchang sawiho a ni.

Chief Secretary chuan heng proposal te hi Sawrkarin uluk takin kil tin atangin Mizoram leh mipuiten an hlawkpui theih dan kawng hrang hrang ngaihtuah chungin ngun taka thlirho a tul thu a sawi a. Company ten Mizoramah investment an neih chu a tha viau mah se investment reng rengin state leh mipui tan hmasawnna a ken tel theih te chu uluk taka buk leh ngaituah a pawimawh hmasa a ni, a ti. He hunah hian Aizawl a Middas Global Group aiawhten heng proposal pahnih chungchang hi sawifiahin zawhna awm te an chhang a, ram an mamawh dan tur te pawh sawilan a ni.

Meeting-ah hian heng proposal chungchangah thutlukna siam a awm lova, hun remchang hmasa berah Global Middas Group hotute hi Aizawlah lokalin heng prosal pahnih an kalpui tum dan chhipchhiar takin Sawrkar hotute an sawipui leh dawn a ni.

Meeting ah hian Land Revenue and Settlement Department, Commerce & Industries Department, Information & Public Relations Department hotulute leh Health & Family Welfare leh Planning & Programme Implementation Department aiawhte an tel bawk a ni.