No.5555/2020-2021

Hmarchhak State pariatte tourism lama tihlarna turin Ministry of DoNER leh North Eastern Council tangkawp chuan internet kaltlangin ni 4 awh tur virtual festival a buatsaih a. He festival ni thum ni-ah hian Mizoram chungchang bik pholanna hun darkar khat chhung neih a ni a, Chief Minister Pu Zoramthanga chu video conferencing kaltlangin khuallian a ni a, Tourism Minister Pu Robert Romawia Royte chu khual zahawm a ni.

Pu Zoramthanga chuan Mizoram chu khuanu kutchhuak chei danglam ngai miahloa hmun mawi, eco-tourism lama thang mek a nih thu a sawi a. Khualzin tam zawkin Mizoram an tlawh theih nana hmalak dan tur mumal taka rahbi duan niin Mizoram Responsible Tourism Policy 2020 siam a ni, a ti. Chief Minister chuan adventure sports lama tui mite tan Mizoram chu hmun duhawm a ni tih sawiin India ram hmun danga la tih ngailoh International Paragliding Accuracy Championship chu Serchhipah neih a nih thu a sawi a. Reieka Adventure Theme Park te, Thenzawl Golf Resort hawn tharte bakah Mizoram khaw hrang hrangah zin mite tana tlawhchakawm tur hmunhma nuam leh mawi tak tak a awm, a ti a. Zin mite himna turin Tourist Police din a nih thu Chief Minister Pu Zoramthanga chuan a sawi bawk.

Tourism Minister Pu Robert Romawia Royte chuan Tourism hmasawnnan nasa taka tan lak mek a nih thu leh a bik takin rural tourism tihlar tum a nih thu a sawi a. Mizo te chu mi hlim thei, mikhualte chunga that chhuah thin hnam an ni tiin COVID-19 hripuiin India ram pumpui a tihbuai mek lai pawhin India rama a vawikhatna atana survey neihah Mizoram chu state hlim ber “Happiest State of India” a thlan a nih hial thu a sawi a ni.

Destination North East 2020 hi September ni 27 khan Union Home Minister Pu Amit Shah hovin neih tan a ni a. India ram mai bakah khawvel hmun hrang hrang atangin internet kaltlangin a duh apiangin he festival hi an chhim thei a ni. Nitin focus state siam niin Mizoram chu September ni 29, 2020 focus state-ah hman niin chhun dar 11 atanga 12 inkar khan Mizoram pual bikin hun hman a ni. Mizo hnam lam chi hrang hrangte entir a ni a, Mizote zinga ram pum huap pawha langsar inkhelthiam Jeje Lalpekhlua leh hockey khel thiam lar Lalremsiami ten thutawi an sawi a. Sumdawnna leh mimal eizawnna kawnga mi entawntlak thenkhatten hun an hmang bawk.

He programme-ah hian NEC Member Air Marshal (Rtd) Anjan Gogoi chuan inlawmna thu a sawi a, NEC Adviser (Banking and Tourism) Pi R.Lalrodingi’n lawmthu sawiin hun hnung a khar a ni.