Vawiin khan Chief Secretary Pu Lalmalsawma IAS hovin Chief Secretary conference room ah sorkar department pawimawh ten ILO leh UNIDO te chakna hmang tangkaia Zoram chhung leh pawna eizawnna hna peng hrang hrang thawk thei tura thalaite buatsaihna tur chungchang an sawi ho.

He meeting ah hian Mizoram chhunga hna peng hrang hrang atan thawktu inchhawr dan leh ram pawn lam thlenga hnathawktu inthawn chhuahna kawngah pawh inkaihhruaina dan mumal tak neih a hun tawh zia sawilan a ni a. Skill development atana vocational course leh training chi hrang hrang te chu sumdawnna tinzawn chunga labour market dinhmun te, technology mamawh te nen thlunzawm leh her rem a pawimawh zia sawiho a ni a. Mizoram mihring awmzat za zela 20% vel chu ramdang mi hnathawka lo awm an nih laiin Mizo thalai tam takin hnathawh tur an hmuh lohna chhan hrang hrang sawiho a ni a. Heti zozai ramdang mi hnathawktu awm hian state sum leh pai dinhmun chauh ni lovin security chungchang thlenga nghawng a neih theih dan pawh tarlan a ni a. Chief Secretary chuan skill development atan hian tuna sorkar department hrang hrangte hmalakna neih mek piah lamah zau zawka ngaihtuahna sen a tul thu a sawi.

Skill development atana hmalakna tur chungchangah hian Chief Secretary hovin sorkar department engemaw zat nen January 13 khan zau taka sawihona neih a ni tawh a. Vawiinah chuan department tlem zawkah insawr bingin ILO leh UNIDO te hnuaia ruahmanna mumal tak kalpui a nih theih nan Labour & Employment, Higher & Technical Education leh Youth Commission te chu a rang lama concept paper buatsaiha hma la turin tih an ni.