Chanmari West Branch YMA chuan vawiin khan an din cham kum 25-na Silver Jubilee lawmna an nei a, bialtu MLA MOS Pu Lal Thanzara’n a hmanpui.
Khuallian Pu Lal Thanzara chuan YMA Silver Jubilee Souvenir tlangzarhin thu a sawi a, kum 25 chhung leka Chanmari West Branch YMA-in Central YMA leh ram pum huap intihsiakna chi hrang hranga an hlawhtlinna hrang hrangte chu chhuanawm a tih thu a tarlang a, YMA Branch dang te tan entawntlak an nih thu a sawi. Kumin 2015-a YMA-in kum 80 a tling tawh mai tur ngaihtuaha, hemi hun chhung zawnga hmingchhiatna nei lova, ram, hnam, kohhran leh khawtlang tana a thawhna zawng zawngte chu ropui tiin Mizo nun ze mawi vawng nunga, thalai tam tak nun suattu ruihhlo donaa tha tam tak an senna te chu chhuanawm a tih thu a tarlang a, YMA kan nei chu Mizo tan a vanneihthlak tak zet a ni, a ti. Hnamdang permit nei lo venna leh dan phal loh thil tawlhruk vennaa sawrkar an thawhpuina avangin lawmthu a sawi bawk. Drugs Licence pek chungchanga Central YMA hotu ten Chief Minister hnena an thlen angin Drugs Licence pek dawnin YMA, MHIP, Local Council / Village Council te hriatpuina nen chauhva pek a nih theih nan order chhuah a nih tur thu a puang bawk. YMA hruaitu nih chu hna hautak, mahni hna leh chhungkaw hna tul kalsan ngai a ni fo tiin Minister chuan vawiin thlenga YMA hruaitu duhawm leh inpe tak tak kan la nei zel chu a lawmawm a, mipui ten chaiwmawi nachang i hria ang u, a ti. Inthlan campaign laia hall tha tak sak a lo tiam tawh chu rokhawlhna avanga tihhlawhtlin a nih tak loh avangin pawi a tih thu a sawi a, tuna Indoor Stadium an neih mek chu khawtlang tana tangkai zawka hman a nih theih nan Auditorium changtlung taka siam tum a nih thu a sawi lang bawk.
Chanmari West Branch YMA hi Chanmari Branch YMA atanga indangin ni 1 Feb. 1990 ah din a ni a, tunah hian member 2879 an awm mek a ni. Hnam lam intihsiakna CM Running Trophy in Cultural Dance Competition ah tum thum lawmman pakhatna an lo la tawh a, ni 17 January, 2015 khan Silver Jubilee pualin Aizawl Civil Hospital ah thisen unit 163 an pe bawk a ni.
Vawiina Silver Jubilee lawmna hi Branch President Pu C.Lalzarliana’n a kaihruai a, Khualzahawm CYMA President Pu Lalbiakzuala pawhin thusawiin an veng thenawm Branch YMA hruaitu ten an hmanpui bawk a ni.
