3649/2024-2025

Aizawl, December ni 23, 2024: Vawiin chawhma khan Apex Committee of State Water and Sanitation Mission chu an Chairman Chief Secretary Pu Khilli Ram Meena hovin CS Conference Hall, MINECO ah Jal Jeevan Missiom (JJM) hnuaia hmalakna thlirlet in meeting neih a ni a.

Member Secretary Er. Lalrothanga, E-in-C, PHED chuan Mizoram chhunga Jal Jeevan Mission hmalakna leh harsatna tawhte sawiin report a pe a. August ni 15, 2019 a he hmalakna tlangzarh a nih atanga kumin February thla thleng khan Mizoram thingtlang chhhungkaw 1,33,060 hnenah tui connection pek a nih tawh thu report in, school 2371 ah leh Anganwadi centre 1567 ah tui connection pek a ni tawh bawk a. He scheme hnuaia thawh tur hna chi hrang hrang te chu zawhfel tep tawh a nih thu leh, hmabak tlem la awm thawh nan sorkar laipui atanga sum release hun nghah a nih thu a report. Tui connection siamfel a nih hnu ah a enkawl zui chu khawtlang hruaitute kuta hlan tura he hmalakna in a phut angin Village Water and Sanitation Committee hlanchhawn a nih thin thu report a ni a. Hetihrual hian khuarel chhiatna in tui lakna a tihchhiat avang te leh chhan dang hrang hrang avangin la inhlanchhawn famkim theih lohna hmun thenkhat a la awm thu a sawi bawk.

Chief Secretary chuan sorkar laipuiin JJM sum Mizoram atana a sanction tawh atanga la release loh chu a rang lama pechhuak thuai turin Sorkar laipui office atanga online in meeting rawn chhimtute hnenah a hrilh a. He mission hi Mizoram chuan a thawh tur ang tha taka a thawh avangin hmabak tlemte awm te zo fel tur chuan sorkar laipui atanga an mamawhte an hmuh thui a tul thu a sawi.

Apex Committee of State Water and Sanitation Mission ah hian PHED, LAD, Finance, I&PR, School Education, H&FW, P&PI leh Rural Development Department Secretary te bakah JJM Mission Director te member an ni.

Attachment

  • Loading attachment...