3648/2024-2025

Dated Kolasib the 23rd December, 2024 : District Level Workshop on Good Governance chu vawiin chawhma khan Kolasib DC Conference Hall-ah neih a ni a. He Workshop Program hi Kolasib DC Pu Robert C. Lalhmangaiha chuan kaihhruaiin, Pu Lalhluna, IPS Officer Retired chu khuallian a ni.

Pu Lalhluna chuan he hunah hian thusawina hun neiin, ‘Good Governance’ tih awmzia sawi zauna leh a thil tumte sawina hun a hmang a. Good Governance-in a tum ber chu ram inrelbawlna kawngah Sawrkar leh Mipuiin langtlang taka hna an thawhhona te, ram kal siam kawnga mitinin an ‘mawhphurhna’ leh ‘chanvo’ a hriatna tur leh ‘dan fel fai tak’ hnuaia mipuite’n an zalenna an hmanna tur a ni a, a ti a. Good Governance chuan mitin an hma zawna an hna theuhah ‘rinawmna’ nei turin a phut thu a tarlang bawk. Pu Lalhluna chuan Sawrkar hnathawkte chu ram leh hnam tana an hnathawhna kawngah mawhphurhna lian tak an neih thu tarlangin, he huna Sawrkar Officials kalkhawmte chu mipui rawngbawl tura Sawrkar hna thawk an ni tih inhria a, thawhrimna, rinawmnate chawinunga zela hna thawk turin a chah nghal bawk.

Hun kaihruaitu Kolasib DC Pu Robert C Lalhmangaiha pawhin thu sawiin kumina Good Governance theme atana thlan Prashasan Gaon Ki Ore chu sawrkar innghahna pawimawh tak thingtlang lam mite huapzo leh sawrkar hamthatna te kim taka an chan theihna tura inhrilhhriatna a ni, a ti a. Tun hnaia sawrkar hmalakna hrangah thingtlang lam mite hamthatna tur chu sawrkar in a ngaihtuah nasa hle a, Digital India te leh Financial inclusitivity te leh Direct Benefit transfer te hmangin thingtlang ah pawh hmasawnna chak takin hmuh chhoh zel a ni, a ti.

DC chuan Good Governance in a tum hlenchhuak tur chuan sawrkar hnathawkte an pawimawh thu sawiin, mipui rawngbawl an nih ang taka mipuite tan an theihtawp chhuah chhunzawm zel turin kalkhawmte chu a ngen a ni.

Vawiin a Good Governance puala Kolasib a workshop neihnaah hian powerpoint presentation hmangin sawrkar hnathawk te'n nasa zawka mipui tan an luanchhuah theihna tur leh dik leh langtlang inrelbawlna a awm theih dan tur te zir ho a ni.

Good Governance Day  hi India ramah kum 2019 atangin December ni 25 ah India ram Prime Minister hlui Pu Atal Bihari Vajpayee a piancham denchhanin neih thin a ni a. Kumin 2024 ah hian December ni 19 atanga ni 24 chhungin ‘Prashasan Gaon Ki Ore’ tih thupui hmangin Good Governance Week hman a ni. He thupuiin a kawh tum ber chu ‘India ram thingtlang hmun leh hmunkilkhawr zawka awmte’n Sawrkar hmalakna an hriatna tur leh Sawrkara hamthatna awmte an hnena awlsam zawka thlen dan tur’ a ni. Good Governance Day hi India Sawrkar laipuiin Sawrkar hnathawk zawng zawngte an mawhphurhna leh chanvo te an hriatrengna hun atan a buatsaih a ni a. Hei hian ram hmasawnna leh mipui rawngbawlna kawngah pawh rah duhawm a chhuah zel beisei a ni bawk.

Good Governance puala workshop Kolasib a neih ahhian Kolasib a sawrkar office hotute leh sawmbik mi pawimawhte thahnem tak an tel a ni.