Ruahman lawk angin Mizoram Civil Service Association (MCSA) 40th General Conference, 2015 chu vawiin 14th May, 2015 (Ningani) hian Aijal Club, Aizawlah tluang taka hman a ni. Conference-ah hian Pu Lalmalsawma IAS, Chief Secretary chu Khuallian a ni.
Chief Secretary chuan India ram chhunga administration lo than chhoh dan sawiin, civil service kalphung hi India ramin British ho hnen atanga a rochun a ni a. Chung hun lai chuan inkalpawhna leh inbiakpawhna a la harsa em em a, mahse ICS officer te khan India ram hi an vil hneh em em a ni. Mizoram chu India rama state te tak te a ni a, tun hma nena khaikhin phei chuan Mizoram khawi hmun mai pawh hi ni khata thlen theih loh a awm mang lo a, transfer leh posting sorkar hotute pawhin min pek te hi hla kan ti hma lutuk ang tih hi ka hlau deuh a, hetiangah hian mahni insangmar a tan kan lak pawh a tul hle a ni, a ti. Chief Secretary chuan MCS officer kal khawmte chu training ngai pawimawh a, mahni chanvo theuh hneh taka hria a specialist ni thei hial tura mahni theuh tan kan lak a tul a ni tiin a fuih bawk a ni.
He Conference hi Session 3-ah then a ni a. Session-I (Chawhma Session) hi Inaugural Session niin Pu K. Laldingliana, Vice-President-in a kaihruai a. Pu Lalzirmawia Chhangte, MCSA President-in Presidential Speech neiin khuallian lawmna leh member-te fuihna thu a sawi. He hunah hian MCS officer Conference inkara boral Pi Lianhmingi Pachuau bakah MCS atana pension tawh, Honorary Member mi 5, (i) Pu R. Vanlalmaka MCS (Rtd.), (ii) Pu D. Purkayastha MCS (Rtd.), (iii) Pu Lalhmingliana MCS (Rtd.), (iv) Pu H. Siku MCS (Rtd.) leh (v) Pu Zahminga MCS (Rtd.) te sunna hun hman a ni. MCS Officer thar mi 15 te lawmluhna hun an hmang a, Pu B. Lalhmingthanga, Secretary to the Government in fuihna thu a sawi bawk. MCS atanga IAS a kaisang thar mi 2, Pu K. Lalthawmmawia IAS leh Pu Vanlalngaihsaka IAS te chawimawina leh thilpek hlanna hun hmangin Pu C. Thatkunga, Secretary to the Government in thilpek te hlanin lawmpuina thu a sawi bawk. Pu Lalhmachhuana, Director, LE&IT in lawmthu sawina hun a hman hnuin Session-I khar a ni.
Session-II chu Business Session-a hman a ni. Report hrang- General Secretary Report te, Financial Secretary Report te leh Sub-Hqtrs. hrang hrang atanga report te ngaihthlak a ni. Agenda ngaihtuah zingah (i) MCS te tana Aizawl-a Transit Accomodation siam thu te; (ii) MCS Cadre Training Regulations neih chungchang te; (iii) Mizoram-a District Administration tihchak chungchang te; (iv) Mizoram Secretariat-a posting kalphung siam fel chungchang te ngaihtuah a ni.
Kum 2015-’17 chhung atana MCSA hruaitu turte thlanna chu Pu David Lalthangliana MIS, Chief Media Officer, NIB/I&PR leh Journalist te kaihhruainain neih a ni a. An hruaitu thlan tharte chu :
President - Pu Lalzirmawia Chhangte
Vice President - Pu K.Laldingliana
General Secretary - Pu V.Lalengmawia
Asst. General Secretary - Pu H.Lalhmingthanga
Treasurer - Pu Paul L.Khuma
Finance Secretary - Pi H.Lalchhandami
