A vawikhatna atan a Champhai Grape Growers' Society (CGGS) ten an grape tui tharchhuah (grape juice concentrate), Radiant Manufacturers Pvt. Ltd. hnena an hralhchhuah hmasak ber tur, litre 16,000 chu nimin dt.14.5.2015 khan Horticulture Minister Pu PC Lalthanliana chuan Tlangsam Winery atangin a vailiam a. He hun hi Parliamentary Secretary Pu TT Zothansanga bakah Horticulture Director Pu R. Zotawna leh official dangten an telpui a ni.
Horticulture Minister chuan grape chingtute chu an thawhrimna leh hmalakna chu a fakawmin a entawntlak a tih thu a sawi a. Thawhrimnaah hlawhtlinna a awm tih chu kuthnathawktuten an hriat nawn a duh thu sawiin, thil tharchhuah chu fair taka hralhchhuah a, quality tha ngaihpawimawh nachang hre turin a chah tel a. Hausak vat vat tum ai chuan hlawhtlin tum hmasak phawt hi a pawimawh a ni, Minister Pu PC Lalthanliana chuan a ti a. Kuthnathawktute dawmkan chu sorkar tih ve tur reng ni mahse, mahni kut leh theihna hmanga thawh ve theih chin pawh sorkar thawh tir talh tum a panchan erawh bansan a pawimawh a ni, a ti bawk.
Parliamentary Secretary Pu TT Zothansanga chuan kuthnathawktute taimak avangin tun hun hi hmu thei kan ni tiin, hmalam hunah pawh thawhrimna chu thlah lo a, tan la zual zel turin a chah a ni.
Horticulture Department Director Pu R. Zotawna pawhin thu sawiin, farmer-te chuan hlawk zawka thar turin department mithiamte thurawn pek chu ngaipawimawh a, grape kung te chu enkawl tha a, leitha pek dan te, cut hun a cut leh pawimawh dangte chu zawm tha turin a chah a, an hmabakah duhsakna a hlan bawk.
Radiant Manufacturing Pvt. Ltd. aiawha lo kal te chuan Radiant Company chu family business a nih thu tarlangin, tuna CGGS-te nena an thawhhona pawh chu mihrang indawr tawn nilovin, chhungkaw indawrna anga an ngaih thu an sawi a ni.
Champhai Grape Growers' Society hnuaiah hian chhungkua 279 inziaklut an awm a. Kum 2010 khan an grape thar hi an hralhchhuak tan a. Radiant Company nena an inremsiamna hi kum hnih chhung kalpui phawt a ni ang a. Grape tui hi litre khat Rs. 50 in Radiant Company in an lei sak a. Brand name hi Vinho Porto Port Wine tih a ni.
Programme hi Pu H.K.L. Thanga, Vice Chairman, CGGS chuan a kaihruai a. Pu C. Lalremsiama, Nodal Officer, CGGS chuan report pe in, Pu C. Zohmingliana, Asst. Secretary, CGGS chuan lawmthu sawiin hun a khar a ni.
