878/2023-2024

Aizawl, the 21st June 2023: Vawiin Ni 21.6.2023 (Nilaini) chawhma dar 10:00 AM hian Chief Secretary Dr. Renu Sharma, IAS, kaihhruaina in Chief Secretary Conference hall-ah Mizoram Employees’ State Insurance Society (MESIS) meeting neih a ni a, he hunah hian Secretary, LESDE Department, Director, LESDE Department, Chief Executive Officer, MSHCS, Employees’ State Insurance Corporation (ESIC) Headquarters atangin Finance Commissioner, Medical Commissioner, Regional Director, Deputy Director, Assistant Director , IMO, ESI Dispensary leh LESDE Department atangin Officers thenkhatte an tel.

Pu Lalramsanga Sailo, IRS, Secretary, LESDE Department chuan member te lo lawmin, MESIS hmalakna leh hmachhawp hrang hrangte sawiho a ni. ESIC Headquarters atangin Ms. T.L Yaden, Finance Commissioner chuan ESI Scheme inrelbawldan, hamthatna chi hrang hrang, tun dinhmuna Mizorama ESI Scheme kalpui a nih tawh dan leh Aizawl District mai ni lovin District dangah pawh kalpui a nih theih dan tur powerpoint presentation pe in a sawifiah. ESI Act, 1948 in a sawi angin private firm mi sawm aia tam hnathawk neite chu he scheme hnuaiah hian in register ngei ngei tura tih an ni a, hmalak chhoh mek a nih dan leh hmalak zel dan tur sawiho a ni. LESDE Secretary, Pu Lalramsanga Sailo chuan ESIC officials lokal te hi Mizoramah hei aia nasa hian awareness campaign leh workshop rawn nei thin turin a chah bawk a ni.

ESI Scheme hi private hnuaia thawkte hamthatna atan India Sawrkarin kum 1948 khan a din a, he scheme hnuaia inziak lutte leh an chhungten damlohna, naupai leh nau neih chungchangah te, hnathawhna avanga ramtuileilohna leh thihna hial tawh thlenga hamthatna an dawn theihna atana duan a ni. He Scheme hnuaiah hian sumdawnna hmun eng pawh – hotel, thingpui dawr, cinema hall, chanchinbu chhutna hmun, dawr, zirna in, damdawiin leh a dangte, mi 10 aia tlem lo hnathawktu awmna te an in register vek tur a ni. Heng hmuna thawk, thla khata cheng 21,000/- aia tam lo hlawhte chuan ESI Act hnuaiah hian hamthatna hrang hrang an dawng thei a ni.

ESI Scheme hnuaia in ziak lutte hian hnathawktu (Employee) in a hlawh atanga 0.75% leh a chhawrtu (Employer) in hnathawktu hlawh atanga 3.25% thla tin a chhun luh a ngai a. Hnathawktu, ni khata cheng 137/- hlawh tling lote chu hnathawktu hlawh atanga pek tur 0.75% hi chhun luh ve a ngai lo a ni.

ESI Act 1948, Section 46 in a sawi angin ESI Scheme hnuaia hamthatna dawn theih te chu hengte hi an ni

1) Medical Benefits
2) Sickness Benefits
3) Maternity Benefits
4) Disablement Benefits
5) Dependent Benefits
6) Funeral Expenses
7) Rajiv Gandhi Shramik Kalyan Yojona
8) Pension te tan Medical Care

Tun dinhmunah hian Mizoramah ESI Scheme hnuaiah hnathawk mi 4006 leh establishment/unit 324 an in ziaklut tawh a ni.