No.846/2021-2022
Aizawl, the 7th June 2021 : Vawiin khan Chief Secretary’s Conference Hall ah Chief Secretary Pu Lalnunmawia Chuaungo chuan COVID-19 hripui darh zel tur venna atana Sawrkarin inkharkhipna thupek “Lockdown Order” a chhuah chungchangah Mizoram Kohhran Hruaitute Committee (MKHC), Joint NGO Coordination Committee, Mizoram Business Coordination Committee (MBCo-C) leh SEC Member te meeting a neihpui a ni.
Meeting ah hian Chief Secretary Pu Lalnunmawia Chuaungo chuan mipuite hripui lakah an him tlan theih nan inkharkhipna hi pawhsei ala ngai rih a ni, tiin hei hi ngaihdan leh duhdan hrang hrang zau taka la a kiltin atanga an thlir hnuah loh theihlohna avanga tih a nih thu a sawi a. Inkharkhipin ei leh bar zawn kawngah nasa taka a nghawng mek te bakah, hemi kaihhnawiha mipuite leh MBCo-C harsatna tawh mekte chu Sawrkarin a hriatthiampui thu a sawi. MBCo-C ten harsatna an tawh mek te pawh sutkian a nih theihnana hmalak leh Central Sawrkar leh RBI khawih thil te pawh nawrpui a nih tur thu Chief Secretary chuan a sawi a ni.
Hripui dona kawnga Sawrkar, kohhran, tlawmngai pawlte leh mipuite thawhhona tha tak chu chhunzawm zel tura mi zawng zawng chahin, hemi kawnga MKHC, Joint NGO Coordination Committee, MBCo-C, LLTF/VLTF te leh mipuite thlawpnaah lawmthu a sawi a ni.
