No.845/2021-2022

Aizawl, 7th June, 2021 : Vawiin khan Health Minister hovin SAD Conference Hall, MINECO-ah mizorama COVID-19 hri kaite dinhmun leh anmahni enkawl dan kalpui mek thlirho a ni a. He hunah hian Medical Operational Team Chairman Dr ZR Thiamsanga, MLA, Health Secretary Pu R. Lalramnghaka, health department hotu pawimawhte bakah ZMC a damlo enkawltu daktawrte, Indian Medical Association, Non-Government Hospital Association of Mizoram, Association of Physicians leh Aizawl Civil Hospital aiawhte an tel a ni.

Health Minister Dr. R. Lalthangliana chuan India ram leh khawvel hmun hrang hrangah healthcare frontline workers nunna chan tam tak an awm tawh a, Mizoramah erawh Pathian venhimna dawngin tun thlengin kan healthcare frontline workers te leh daktawrten hna an la thawk thei hi kan vannei takzet a, an inpekna leh thahnemngaihna a fakawm hle bawk a ni, a ti a. Hripuiin min chamchilh thuk taw hem avangin kan beisei loh thil kan tawng chho ta mawlh mawlh a, nunna chante kan nei zing tial mai hi anmahni enkawltute rilru a nat ang bawkin kan rilru a na ve a, theihtawp in chhuah tak meuh tih kan hriatpui che u avangin kan thlamuanpui reng che u a ni, a ti.

Minister chuan thalai hrisel tha tura ngaihte pawhin nunna an chan ta mek a, a damdawi tun thlengin hmuhchhuah a la ni si lo bawk nen, damlo enkawl dan (treatment protocol) sawiho a, a tha thei ang ber turn i a kan hriat ang kan ngaihtuah tlan a ngai a ni, a ti a. 3rd wave lo thleng tur nia an sawi kan lo hmachhawn dan tur pawh sawiho a pawimawh hle a ni, a ti bawk.

ZMC-a COVID-19 hri kaite enkawltu daktawrte chuan damlo te zingah nunna chan an awmin an rilru a nat thu leh ghrehawm an tih thin thu sawiin, theihtawp an chhuah tak meuh tih an sawi a. Natna benvawn nei lo zingah pawh nunna chan an awm tak thu sawiin , kan taksa in natna hrik a lo do theihna (immunity) chak tawk dan hi a hriattheih si loh a, immunity nei than i a kan hriatte pawh an thi ta zel mai hi a pawi takzet ani, an ti.

ZMC daktawrte chuan Home Isolation, CCC leh CCCC atanga damlo na zual deuh ZMC a an rawn phurh thlen te hi an dinhmun a lo tha lo hman viau zel tih sawiin ,a bik takin Home Isolation/Home Quarantine, CCC leh CCCC a awmte chu pulse oxymeter hmanga a zing thei ang bera an oxygen level check thin tura an duh thu sawiin, oxygen level (SPO2) 94% hnuai lam a nih chuan rang taka daktawrte hnena in report nghal thin tura an duh thu an sawi a, a bik takin Home Isolation/Quarantine a awmte chuan pulse oxymeter leh thermometer nei ngei ngei se an duh thu an sawi a ni.

Home Isolation/Home Quarantine, CCC leh CCCC a awmte daktawr ten tun aia uluk zawk leh mumal zawka vil dan kawng ruahman a tul thu sawi a ni a, COVID-19 hri kaite chuap chu damlo dang aia a chhiat nasat thin avangin ventilator nazawngin a pui thei lova, sawrkarin ventilator tha chi 25 lai a chah thleng chu lawmawm an tih thu an sawi a, tuna an neih sa nen ventilator chungchangah chuan tun dinhmunahn thlaphanthlakm rih lo ah an ngai a ni.

Aizawl khawpui chhunga COVID-19 hri kaite chu veng hrang hrang an nih thin avangin avangin ambulance a damlo thiar kawngah tunah chuan lockdown lai a ni a, traffic jam a awm loh avangin a la zia deuh a, lockdown phelh hun atan ruahmanna siam lawk a tul thu sawi a ni a, Aizawl chhuah lam, tlak lam, chhim leh hmarah Ambulance service te duty na tur hmun ruahmna a tul dawn ni a a lan thu sawi a ni.

COVID-19 hri kaite enkawl an nih dan chipchiar taka sawiho niin, damdawi hmuhchhuah a la nih loh avangin tuna inenkawl mek dan bakah engtianga hmalak tur nge tihte sawi a ni a. Central sawrkarin nimin lawka treatment protocol a tihchhuah chu lo zirchianga, kan dinhmun en chunga ruahmanna (treatment protocol) thar siam turin Principal Director, H&FW department kaihhruaina hnuaiah team din a ni.

Third Wave lo thleng turah naupang hovin an tuar na dawn nia sawi a awm vangin tunah hian ZMC-ah Neo-natal Intensive Care Unit (NICU) ruahman mek a nih thu sawi a ni a. NICU a nurse duty tur te chu Aizawl Civil Hospital NICU ah training pek nise tha tih a ni a, ZMC ICU a duty tur hian nurse nazawng tan tih theih a nih loh avangin ICU experience nei nurse mamawh belhna a nasat thu sawi a ni a, sawrkarin theihtawp chhuahin hma a lak mek thu sawi niin, Private Hospital neitute chuan sawrkarin a mamawh a nih phawt chuan an hnuaia thawkte pawh an thawhchhuah tir thrih tur thu an sawi a ni.

ZMC a daktawr indaihlohna bakah nurse leh Group D staff indaihlohna avanga harsatna an tawh phuhrun turin kawng dap zel a tul thu sawi a ni a. Damlote dinhmun hrechiang lehzual tura tan lak a ngaih thu sawi niin, hemi atan hian ZMC-a bio-chemical laboratory chu test chi hrang tam zawk kalpui thei tura tihchangtlun vat a pawimawh thu sawi a ni.

COVID-19 hri kai, negative tawh, an negative hnu a natna dangin a tlakbuak an awm nual tawh thu sawi niin, an taksa peng thenkhat a lo chhiat hman avanga thi report tam tak a awm thu sawi a ni. Mizoramah pawh chin hriat a nih loh avangin post-COVID care atan hian damdawi in zawng zawng an inruahman a tul tih tarlan a ni a, ZMC-a COVID-19 hri kai enkawl dam tawh (negative) natna dang vanga inenkawl ngai leh oxygen la mamawhte enkawlna tur hmun pawh ruahman mek a nih thu sawi a ni.

Tuihu hip (steam inhalation) hi COVID-19 hri laka inven nan a him loh thu leh India ram State thenkhatah phei chuan mithiamten zirchianna an neih tawh thu sawi a ni a. Steam inhalation tih nasat leh lutuk hian kan hrawka natna hrik rawn vaw chhuaktu a tihchhiat theih avangin fimkhur a tul hle tih tarlan a ni.

Vawiina daktawr thiam rual kalkhawmte chuan Mizoram mipui 70% in vaccine an lak fel chuan herd immunity kan neih theih an rin thu an sawi a, hripui tun anga kan do hi chuan kan do hneh tak tak theih a rinawm loh a, ram ropui zawkte pawhin vaccination an kalpui that avangin an dinhmun a ziaawm tawh a ni an ti a. Mihring kan tlemna hi remchangah la in vaccine kan dawn kim thuai theih nan nasa lehzuala tan lak dan ngaihtuah a tha an tih thu an sawi bawk a ni.