Vawiin khan Chief Secretary Pi L.Tochhong hovin CS Conference Hall-ah Mizoram Watershed Development Agency (MzWDA) Meeting neih a ni a, he meeting-ah hian Pu V.M.Arora, Director, Dept. of Land Resources, Ministry of Rural Develoment, New Delhi pawh a tel a ni. Mizoram-ah chuan MzWDA hi Sorkar Laipui hnuaia Integrated Watershed Management Programme (IWMP) kalpui mek enkawltu ber State Level Nodal Agency (SLNA) a ni.

Vawiin meeting-ah hian June ni 10, 2013-a SLNA meeting neih tawha hmalakna tur an sawiho tawh bawhzuina te ennawn a ni a. District tina MzWDA Project kalpui mek leh hmachhawp te sawiho a ni bawk. Chief Secretary Pi L.Tochhong chuan IWMP hnuaia Mizoram chhunga Project kalpuite chu ngun zawka vilh a tul thu te, project siam leh report siam chungchangah pawh uluk leh felfai zawka tih a tul thu a sawi bawk. Hemi atan hian state level training pawh buatsaih thuai a rawt bawk a ni.

Ministry of Rural Development aiawha lo kal Pu V.M.Arora chuan IWMP hnuaia infrastructure hrang hrang kalpui mekah mipuite tan inhlawhna remchang siam sak zel chu sorkar laipui duhthusam a ni, a ti a. Mizoram chu tlangram a ni a, ruahsur tamna a nih bawk avangin kawng an siam hunah pawh tuihawk luankawr (drain) siam tel chu ngai pawimawh turin a chah a ni. MzWDA ten an hnathawhna kawnga harsatna hrang hrang an tawhte sawipuiin Pu Arora chuan heng an harsatnate sukiang turin Ministry chuan theihtawpa tanpui leh finchhuah a inhuam reng a ni, a ti.