Vawiin khan Govt. Johnson College kai thar te lawmna inkhawm Aizawl Vanapa Hall-a neihah Home Minister Pu R Lalzirliana chu khuallian a ni.

Home Minister Pu R Lalzirliana chuan kan ramah zirna boruak tha siam turin kohhran leh khawtlang hruaitu ten hna an thawk ang a, sorkarin zirna mamawh hrang hrang leh hmanraw tha te a ngaihtuah zel ang a, zirtirtu, nu leh pa leh zirlai ten theihtawp an chhuah bawk ang a, mahni mawhphurhna theuh hlena kan tanrual phawt chuan Mizoram zirna a chhe thei ngai lovang, a ti. Mihring nun hlutna hi damrei zawnga teh a ni ngai lova, a tangkaina laiah zel an teh thin tiin kan ram leh hnam tan hian enge ka tih anga, engtinnge ka tangkai ve theih ang tih ngaihtuahna nen ram tan lehkha zir turin zirlaite a fuih a ni.

Pu R Lalzirliana chuan India ram hmasawn chakzia thlirin zirlai te hmabak kawl a eng tan dawn chauhva, ram hruaitu nih mai duh tawk lova khawvel huapa hruaitu langsar nih tum tur leh hmathlir thui tak nen an thiamna tat hriam sauh sauh turin zirlaite a chah a. Tunlai khawvelah thiam sanna aiin chhawrtlak, hmantlak, rawihtlak thiamna neih a pawimawh zawk tih hria a, tunlai khawvelin eng thiamna nge a mamawh tih ngaihtuah chunga tum mumal tak nei turin zirlaite a sawm a. Nakin lawka ram hruaitu la ni mai tur an nih avangin zirlaiten nun zemawi, aia upa zahthiamna leh hawihhawmna nen rual elna rilru thianghlim pu a mi puitling leh hmantlak nih tuma tan la sauh sauh turin a fuih a. Ram chhung leh ram pawn hmun hrang hranga hna thawk thei turin sap tawng leh hindi a pawimawh tih hria a, chu lam kawngah pawh an rilru seng turin Home Minister hian a fuih bawk.

Home Minister hian Govt. Johnson College Annual Magazine ‘Sulhnu’ a tlangzarh bawk.

Kai tharte lawmna inkhawmah hian zofate zinga Everest tlang lawnchhuak hmasa ber David Zohmangaiha leh Base Camp Manager Pu Vanlalliana te hnenah chawimawina thuziak leh thangchhuah diar an hlan a. An Principal Dr K Vanlalmawia’n kalkhawm te lawmna thu chah a sawi a bawk.