Vawiin chawhma khan Chief Secretary Pi L Tochhong hovin CS Conference Hall, New Secretariat-ah Mizoram Watershed Development Agency (MzWDA) meeting neih a ni a. MzWDA hi Integrated Watershed Management Programme (IWMP) Mizorama kalpuitu State Level Nodal Agency a ni.

Meeting hi Chief Secretary chuan Chairman, MzWDA a nihna angin a kaihruai a, meeting-a Agenda hrang hrang te chu Commissioner & Secretary, Rural Development Pu Lalrinliana Fanai chuan a pharh a SLNA Officer-te, MzWDA member-te bakah DRDA Project Director-te chu meeting ah an tel a ni.

Meeting ah hian Mizorama, Integrated Watershed Management Programme (IWMP) hmalak tawhnate enho leh hmalak zel dan tur thlirho niin thil pawimawh dang tam tak sawiho a ni bawk. Kum 2012-13 leh 2013-14 atana IWMP project thar 29 tan DPR pharh a ni a, heng DPR te hi Sawrkar Laipuia, Ministry of Rural Development hnuaia Department of Land Resource a thehlut turin meeting hian a pawm a ni.

IWMP hi Centrally Sponsored Scheme (CSS) niin Mizoramah 2009-2010 khan bul tan a lo ni tawh a, Mizoram Watershed Development Agency (MzWDA) hi IWMP kalpuitu State Level Nodal Agency a ni. Rambua leh chhe mek chei that te, tui leh leilung luangral venhim te leh thingtlang miretheite khawsak phung leh eizawnna ngelnghet siamsak te hi a tum ber a ni.

Mizoram puma District zawng zawngah Project 89 kalpui mek a ni a, khua 300 tuam mekin, ram hectare 373915 a zau a tuam mek a ni.