North East Zone Cultural Centre (NEZCC), Dimapur leh Art & Culture Department, Mizoram tangkawp buatsaih UMANG Festival chu October 29-31, 2014 khan Synod Conference Centre-ah neih a ni. He festival hi kum 2009 atang khan Mizoramah hman tan niin kumin hi a vawi 5-na a ni.
UMANG festival-ah hian Gilead Special School, Aizawl; Moriah Blind School, Luangmual; Special Blind School, Durtlang; MHIP Special School, Lunglei; Shalom Special School, Serchhip leh Integrated Blind School, Kolasib-te an tel a. Official te nen an vaiin mi 61 an ni.
October ni 29 chawhnu dar 1:30 khan festival hi tan a ni a. Workshop-a bul tanin Thread Work an zirho a. Resource person atan Gilead Special School zirtirtute hman an ni. A ni hnih ni-ah Mizo hnam lam chi khat ‘Chai’ zirho a ni a, Thread Work zir chhunzawm leh in hemi zawh hian Re-use paper an zirho leh a. Festival chhunga Thread Work leh Re-use paper hmanga thil dahna mawi tak an siamte chu a duh apiang hmuh theih turin phochhuah a ni.
UMANG festival kharna inkhawmah hian Art & Culture Minister Pu R.Romawia chu khuallian a ni a. Kharna inkhawm hi Art & Culture Director Pu Ngurbiaka’n a kaihruai thung. Participants te’n zai, lam leh rimawi hmangin kalkhawmte an awi a ni.
