Mizorama Human Rights dinhmun hre chiang tur leh hemi chungchanga hmalakna hrang hrang ngaihven turin National Human Rights Commission of India (NHRC) Secretary General, Pu Satya Narayan Mohanty IAS chu vawiin khan Aizawl a lo thleng. Zan hnih cham tura Mizoram lo zin NHRC Secretary General chuan vawiin tlai dar 4:00 khan Chief Secretary Conference room-ah Mizoram sawrkar hnuaia Department hruaitute a kawm nghal a. Inkawmhona hi Chief Secretary Pu Lalmalsawma IAS in a kaihruai a ni.

 Pu Satya Narayan Mohanty chuan kalkhawmte chu Mizorama Human Rights chungchang sawipuiin, NHRC Special Rapporteur te zirchianna ah Mizoram chu India ram State te zingah Human Rights dinhmun nei tha zing a mi a nih thu a sawi a. Food Security Act 2013 hnuaia Mizoram sawrkar hmalakna, lungin tangte dinhmun leh an harsatna tawh hrang hrang te, District Mental Health Care Programme hnuaia hmalakna, leh MGNREGA hnuaia hna kal mek te meeting-ah hian sawiho a ni. 

 Vawiin meeting-ah hian Social Welfare Department, Home Department, UD&PA Department, Rural Development Department, Agriculture Department, Health & Family Welfare Department leh Food, Civil Supplies & Consumer Affairs Department hotute an tel a ni.

 NHRC Secretary General hian naktukah Universal Women Helpline & One Stop Centre, Khatla a tlawh hnu ah home hrang hrang a tlawh kual dawn bawk a ni.

 National Human Rights Commission of India hi autonomous public body niin, October ni 12, 1993 khan Protection of Human Rights Act, 1993 dan kengkawh tura din a ni.