NLUP Phase-II hnuaia thlai tiak, sangha chi leh ran vulh tur pek chhuah dan tur chungchang ngaihtuahin NLUP Input Purchase Board chu Chairman Pi L.Tochhong hovin vawiin khan Chief Secretary conference room-ah an thu khawm.

Vawiina meeting ah chuan NLUP Phase I-a heng department 4- Horticulture, AH&Vety, Soil & Water Conservation leh Fishery department hnuaia beneficiary ten anmahni remchan dan anga thlai tiak leh ran vulh tur etc.an lak khawm dan leh he kalphung fel tawk lohna lai te sawiho a ni a. Phase II hnuaiah kalphung mumal zawk a awm theih nan tender hmanga thlai tiak(certified) supply kalpui tawh turin ruahman a ni. Vawk note tam zawk thar turin Aizawla piglet multiplication centre te chu tihlen tura tih a ni a, hei bakah hian Fishery department nursery te pawh thawktu tam zawk nena thuam turin hma lak tum a ni.

Pi L.Tochhong chuan NLUP hmalakna a thuanawp loh nan Input Purchase Board chuan kalphung thar a neih a tul tih sawiin a kaihhnawih department te chu nasa lehzuala tan la turin a chah a. NLUP in miretheite tana eizawnna a buatsaih sak chu a ngelnghet tur a ni, tiin phase I hnuaia beneficiary ten an hmalakna an chhunzawm tha em tih enfiah a, department hmalakna dinhmun te enchiang tur leh thla 1 chhunga evaluation report siam peih turin department 4 te chu a hriattir a ni.