Vawiin khan Chief Secretary Pi L Tochhong hovin Chief Secretary Conference Hall-ah Lumding-Badarpur-Silchar inkara Rail kawng tih zauh hna, October ni 1, 2014 atanga tan tur avanga Mega Block awm tur chungchang chu a kaihhnawih Department hotulu te leh an aiawh bakah FCI, IOC leh BRO aiawhte nen review meeting neiin ruahmanna hrang hrang chipchiar takin an sawiho.

Chief Secretary chuan rail kawng zauh hna thawh chhung hian buhfai leh nitin mamawh te chawkluh kawnga harsatna awm thei kan paltlang leh sutkian nan hemi chungchang kaihhnawih Department-te chu kan tanho leh rim taka kan thawhho a tul dawn a ni, a ti a. Food, Civil Supplies & Consumer Affairs Department chuan ruahmanna hrang hrangte chu rang taka an bawhzui zel leh an vil a ngai dawn a ni a ti bawk.

Meeting-ah hian kalkawng chungchang te, buhfai din hmun (stock) chungchang te, POL chungchang te, LPG chungchangte leh Dan leh Thupek chungchangte ngaihtuahin sawiho a ni.

October ni 1 atang khian Lumding-Badarpur-Silchar inkara Rail kawng tih zauh hna chu tan anih dawn avangin Mizorama rail hmanga buhfai phurh luh thin chu hna thawh chhungin tihtawp lailawk a ni dawn a. Mizoram bakah Tripura, Manipur leh Assam chhim lam District te pawh Mega Block hian a huam dawn a ni. He hna ‘Gauge Conversion’ hi March 2015 a zawh hman tura ruahman a ni.

Mizorama FCI in thla thum kalta chhunga rail hmanga buhfai a phurh luh chawhrual chu thlatin 77200 quintal a ni a, hemi chhunga motor-a buhfai phurh luh chawhrual chu thla tin 40500 quintal a ni. Mega Block chhung hian rail-a buhfai a phurh luh thei dawn loh avangin buhfai hi motor chauha phur theih a ni dawn.

Mizoram thlatin buhfai mamawh 132210 quintals bakah khawsak nana mamawh (essential commodities) zawng zawng te October ni 1, 2014 atang chuan motor (by road) a phurh luh vek a tul tawh dawn avangin, buhfai leh mamawh thil (essential commodities) Mizoram a phurh luh hlawhtlin nan NH - 44 leh NH - 54 siam that/enkawl a pawimawh dawn bakah Mizoram chhung leh State thenawm NH-44 leh NH-54 in a paltlang a dan leh thupek kenkawh leh a dinhmum ah te a innghat ang.

Mega block chhung hian Guwahati bul Changsari leh Baihata atangin Mizoram buhfai hi lak/phurh tur a ruahman a ni.

August ni 21 2014 a Supply Minister Pu John Rotluangliana’n Press Conference a kohah Mega block chungchanga sawrkar hmalakna hrang hrang a sawi chhuak tawh a. Mipuiin ei leh bara harsatna an tawh loh nana ruahmanna thar ber chu Sawrkar Laipuia, Ministry of Consumer Affairs, Food & Public Distribution ruahmanna in Myanmar (Burma) atanga buhfai lak luh dan buaipui a ni.

Hemi chungchangah hian Metals and Minerals Trading Corporation of India Ltd. (MMTC) New Delhi chuan Myanmar atanga buhfai 100000 quintals lak luh (import) nan tender ni 8/9/2014 khan a ko a, ni 23/9/2014 hian tender hi tihfel a ni ang. Buhfai hi Zokhawthar atangin Aizawl, Lunglei leh Lawngtlai a dah tur a ruahman a ni a, Aizawl, Lunglei leh Lawngtlai buhfai thla 5 chhung mamawh hi heta tanga hmuh tur a ruahman a ni.

Zokhawthara Trade & Commerce godown 800 MT capacity chu buhfai dah lailawk nan hian ruahman a ni a, atul ang zel in hmun dang pawh dap zel a ni ang.

Pu A.Trivedi, Director MMTC, New Delhi, Pu A Chakma Dy. General Manager MMTC New Delhi leh Pu B. Tayeng, General Manager FCI Regional Office Shillong te hi a chunga tarlan bawhzui tur in ni 10/9/2014 khan Champhai an thleng a, vawiin hian Champhai leh Zokhawthar-a kawng dinhmun leh buhfai dahna tur an enfiah.

Mizoram buhfai mamawh tam ber hi chu Guwahati atanga by road a phurh tura ruahman a ni. Mizorama buhfai lakluh nan Inland Water Transport pawh bawhzui zel a ni.

Mega block chhunga Mizoramin harsatna kan tawh loh nan mimal/pawl/ association hrang hrang te Mizorama ei leh bar phurh luh kawngah harsatna siam lo tur leh sawrkar/department ruahmanna te tha taka tawiawm  turin ngen an ni.