Vawiin chawhnu khan Mizoram chhung a upa leh tar chaklo hamthatna ngaihtuahtu committee sangber, State Council for Older Persons(SCOP) chu Chief Minister Pu Lal Thanhawla hovin Cabinet Meeting Room ah an thukhawm a. Meeting ah hian Mizoram a cheng, India khua leh tui Kum 60 chin chunglam te hamthat nana SCOP hmalak tawhna leh hmachhawpte pharh niin Mizoram Upa Pawl(MUP) rawtna theh luh te pawh zirchian a ni.

Meeting kaihruaitu, Chief Minister Pu Lal Thanhawla, State Council for Older Persons(SCOP) a Chairman ni bawk chuan kum upa te tan chuan inthlahrunna tur tam tak an chenna chhungkua ah ngei a awm awlsam em em a. Chhan hrang hrang zingah hrisel lohna avangte leh tih theih tawk te a lo tlem tawh thin avangin hnawksak nia inngaihna te pawh a lo piang thei thin tih hriatsak a ngaih thu leh kawng tin renga ngaihsak bik leh dawhthei taka enkawl an mamawh thu a sawi a. Thiamna sang zel, damdawi tha te leh ei leh in lo that tak zawk avangin kum 60 chin hi an la pung zel dawn in a lang a, chuvang chuan SCOP hmalakna pawh chak zawk a kalpui a ngai a ni a ti a.Tar chaklo enkawltu neilo te tana din a nih angin SCOP pawhin tar chaklo zawkte enkawl hna chu huap zau zawk a kalpui zel a tum a ni a ti.

SCOP in a tarlan dan chuan kum 2011 a Mizoram chhiarpui ah kum 60 chin chunglam mi 49,799/- an awm a, heng zinga mi 25251/-, BPL chhungkua a cheng te hian upa chhawmdawlna pawisa thlatin an dawng a ni. Upa chhawmdawlna pawisa hi kum 60 leh 79 inkar in Rs 250 an la a, kum 80 chin chunglam chuan Rs 550/- an la thung. Heng tanpuina sem chhuah ah te hian mipa khat tan Mizoram sawrkarin Rs 50/- zel thawh ve in a tam zawk hi Ministry Of Rural Development in a tum a ni. Tun dinhmunah State sawrkar enkawl Old Age Home pakhat, khum 10 awmna Government Complex Veng ah a awm mek a. Hei hi tihlen tum tumin Social welfare department chuan hma a la mek a, tlawmngai pawl hrang hrang in tar chaklo chhawmdawlna in leh hmanrua te siam tum in hma an la mek bawka, heng an rawtna leh ruahmanna siam tak te hi Social welfare Department chuan Sawrkar laipui ah a thawn sak tawh a ni. Kum upa te hamthat nan Mizoram sawrkar chuan State policy for older persons, state action plan for older persons, state council for older persons, the maintenance and welfare of parents and senior citizens act, 2007 te leh the mizoram maintenance and welfare of parents and senior citizens rules, 2013 a siam tawh bawk a ni. Heng bak ah hian Health Department leh Transport Department chuan kum 60 chin chunglam tana hamthatna siam ngai te an siam tawh bawk a ni.

State Council for Older Persons(SCOP) meeting ah hian Social Welfare Minister Pu PC Lalthanliana, Parliamentary Secretary Pu K.Lalrinthanga te bakah member dang, NGO hruai te, Social Welfare Department hotute leh Sawrkar hotulu-te an tel a ni.