Vawiin chawhnu khan save Chite Lui Executive Committee (SCLEC) chu Chief Secretary Conference Hall-ah an Chairman Pu Lalnunmawia Chuaungo, Chief Secretary hovin an thukhawm.

Vawiin thutkhawmnaah hian Chite Lui humhalhna tur dan “The Chite Lui (Prevention and Control of Water Pollution) Rules, 2019” buatsaih mek chu tihpuitlin thuai anih theih nan chak zawka hmalak dan tur sawiho a ni a, Chite Lui chhawr tangkaitu Aizawl khawchhunga veng hrang hrang 47 aiawh Local Council, MUP, MHIP, YMA etc. te nen a Chite Lui humhalha tihnun thar leh kawnga thawkho tura inkawmkhawm chungchangte, Save Chite Lui project atana NEDP pawisa Rs. nuai 22.90  awm sa tangkai taka hman dan tur te, Chief Minister kaihhruaina hnuaia Chite Lui humhalh tura beihpuithlak chungchangte, Chite Lui hnawmhnawk plastic chharkhawm hmanga Mizoram Green Road hmasa ber siam chungchangte leh thil pawimawh dang chi hrang hrang sawiho a ni a, Chite Lui humhalha tihnunthar lehna tur atana Luidung detailed survey neih dan tur leh master plan siam dan turte sawiho a ni bawk.

SCLEC Chairman Pu Lalnunmawia Chuaungo chuan Save Chite Lui Movement hian Chite Lui mai bakah lui dang te pawh humhalh tel a tul zia leh a pawimawhzia mipuite thinlungah a tuh nasa a thil lawmawm tak leh hmasawnna pawimawh tak a ni a ti a, Lui kama Sawrkar leh Vantlang ram te mimal kuta a luh loh nana hmalak a pawimawh hle a a hriat thu sawiin, Chite Lui bakah Aizawl khawchhung leh a chhehvela lui zawng zawngte humhalha tihnunthar lehna tura zau zawka hmalak dan tur ngaihtuah a tul thu a sawi bawk a ni.