Vawiin khan Lawngtlaiah Green Mizoram Day hman a ni a. Chawhma dar 11-ah Lawngtlai DC office kawtah a hawnna inkhawm buatsaih niin, Govt Lawngtlai College Principal Pu T. Thangthuama chu khuallian a ni.

Pu T. Thangthuama chuan hun rei tak Green Mizoram Day hman lo ni tawhin, thing pawh kan phun tam tawh hle a, amaherawhchu, duhthusamin a hlawhtling thin lo, a ti a. Green Mizoram Day hlawhtlinna tak tak tur chu thing phun tam ringawtah ni lovin, a nun that nana enkawl zui lamah a ni, a ti. Ramngaw leh nungcha chereu zel chu mihringte hi a tuar nasa ber kan ni a, thangtharte leh tuna chhuan kal mekte tan pawh kan ram hi ram nuam leh chenna tlaka siam turin kumin Green Mizoram Day thupui, "Thing phunin sik leh sa vawng tha rawh," tih hi thupui pawimawh leh a taka tihhlawhtlin ngei chi, ram hmangaihtute tan chuan tihmakmawh a ni, a ti.

Hawnna inkhawm hi Lai Autonomous District Council (LADC)-a District Council Conservator of Forests (DCCF), District Level Committee on Green Mizoram-a Member Secretary ni bawk Pu K. Lalromawia'n kaihruaiin, Lawngtlaia Green Mizoram Day hman tawh dan a sawi a. Addl DC Dr Andrew H. Vanlaldika MCS chuan kangmei ven kawnga thawk tha khua chawimawina 'Village Level Fire Prevention Award 2019' dawngtu khuate hnenah lawmman a hlan.

Village Level Fire Prevention Award 2019 lawmman pakhatna hi Vawmbuk khuain an dawng a; pahnihna chu Lawngtlai College Veng niin, Saizawh East chu pathumna an ni. Lawmman pakhatna hian Rs 50,000/- leh thuziak, pahnihnain Rs 30,000/- leh thuziak, pathumnain Rs 20,000/- leh thuziak te a keng a ni.

Hawnna inkhawmah hian Green Mizoram Day 2019 thutiam chham rual a ni a. Hun hman zawhin sawrkar department hrang hrang leh tlawmngai pawl YLA leh MJA te'n Mampui kawnga an thing phunna hmun tur lam an pan nghal a. Vawiin hian thing tiak 340 vel phun a ni.

Green Mizoram Day hi a tirah chuan Green Aizawl tiin kum 1998 khan Aizawlah hman tan a ni a. Kum 1999 atangin Green Mizoram tih hming chawiin ram pumah hman a ni. Lawngtlai District bikah chuan kum 2000 atang khan hman tan niin, kum tin hman a ni a. Nikum Green Mizoram Day-ah khan Mampui kawngah vek hian thing tiak 377 phun niin, za zela 70 (70%) a nung a ni.