1462/2023-2024

Aizawl, the 11th August, 2023: Vawiin chawhma dar 11:00 khan Sustainable Development Goals Local/Grassroot Index Ranking Award Programme chu Dawrpui Multipurpose Hall, Aizawl-ah Khuallian Chief Secretary Dr. Renu Sharma hova neih a ni. Chief Secretary chuan SDG Report a tlangzarh nghal bawk.

Khuallian Chief Secretary Dr. Renu Sharma chuan Sustainable Development Goal 17 te tihlawhtling turin India pawhin phur taka hma a lak chhoh thu leh, hemi hnuaia hmalaknate a hlawhtlin theih nan Mizoram Sawkar pawhin theihtawp a chhuah thu a sawi a. Hmasawnna tluantling leh tlo neih a nih theih nan Sawrkar chauh nilo, mimal leh cilvil society zawng zawngte tanrual a ngaih thu sawiin, mimal leh pawl hrang hrangte chu hemi tihlawhtling tura thahnemngai taka Sawrkar tawiawm zel turin a chah a. Tunhnaia NITI Aayog-in Sustainable Development Goals kalpui tha a tih chhuah SDG India Index-ah Mizoram chu State hmasawn ber atana thlan a ni leh India rama 12-na dinhmun a chuangkai thei chu lawmawm a tih thu a sawi a; khawtlang huapa thawhhona tha tak awmna Mizoramah SDG thiltumte hlawhtling taka kalpui a nih ngei a beisei thu a sawi bawk.

Sustainable Development Goal-te a bulthum atanga kalpui a nih theih nan khua leh veng hrang hrang thlan chhuahte dinhmun zirchianga hmalak a nih thu sawiin, hemi hnuaia intihsiakna tehfung hrang hrang 9 hmanga neih chuan rah tha a chhuah ngei a beisei thu a sawi a. Intihsiakna a tel zawng zawngte fakawm tiin, hmasawnna tluantling leh tlo siam tura theihtawp chhuah puiah a sawm a. Khawtlang anga thawhhona tha leh mipuite inkara thawhhona tha tak awmna Mizoramah Sustainable Development Goals-te chak taka tih puitlin a nih theih ngei a beisei thu a sawi bawk.

Mizorama Sustainable Development Goals kalpui a nih theih nana NITI Aayog, Ministry of Statistics & Programme Implementation leh DONER Ministry-te hmalakna bakah hemi kaihhnawih Sawrkar Department leh anmahni tawiawmtute fakawm a tih thu a sawi a. Mizoram SDG Dashboard siam thuai tum a nih thu leh thupui pawimawh tak 'Mi tumah hmaih bik an awm tur a ni lo' tih chu ngaipawimawha Mizoram puma huapzo hmalakna kalpui tura tanlak a tul thu a sawi a. College hrang hrang 22 te'n khaw thlan bik 'adopted village' neia an mamawhte zirbingna an nei leh tanpui dan tur an chhawpchhuahte chuan awmzia a neih ngei a beisei thu a sawi bawk.

He hunah hian Planning & Programme Implementation Department-in Localization of Sustainable Development Goals Pilot Project, khawpui leh thingtlanga a lo kalpui tawh atanga a titha zual veng pathum leh khaw pathumte hnenah Project Incentive Award sem chhuah a ni a. Veng leh khua vawiina chawimawina pekte dinhmun leh anmahni veng/khua theuha hmasawnna ruhrel siamna tur Project Incentive Award an dawn zat chu a hnuaia mi ang hi a ni:

A. Urban Indicator Framework (UIF):
1) Pakhatna: Chanmari West, Aizawl (Rs. 10,00,000/-)
2) Pahnihna: Kulikawn, Aizawl (Rs. 8,00,000/-)
3) Pathumna: Luangmual, Aizawl (Rs. 5,00,000/-)

B. Village Indicator Framework (VIF):
1) Pakhatna: Thingsul Tlangnuam, Aizawl District (Rs. 10,00,000/-)
2) Pahnihna: Pawlrang, Saitual District (Rs. 8,00,000/-)
3) Pathumna: Rawpuichhip, Mamit District (Rs. 5,00,000/-)

He huna tarlan a nih dan chuan Sawrkar laipuiin 20 Point Programme hnuaiah khaw tinte thing tiak 4770 phun tura a beisei chu Mizoram khua zawng zawng zingah Pawlrang khua chu he target tlin awmchhun an ni a, an ni hian January ni 1,2022 February ni 15,2023 chhung khan thing tiak kung 5000 an phun tling a, hei vang hian Special Award pek an ni a, Special Award hian khawtlang hmasawnna ruhrel siamna tur Project Incentive Award Rs. 2,00,000/- a keng tel a ni.

SDG kalpui tur hian Financial year 2022-2023 atan Mizorama khua Pillot Village 62 te thlan niin, category 3 ah then an ni a. Heng bakah hian AMC Ward 19 atangin Pilot Locality 1 theuh thlan an ni bawk.

Vawiin hun hman hi Pu Lalmalsawma Pachuau, Secretary, Planning & Programme Implementation Department chuan kaihruaiin, Pi Rosangzuali Chawngthu, Sr. Consultant, SDGCC, Planning & Programme Implementation Department hnen atangin SDG Local Index Ranking Exercise & Project kalpui dante  ngaihthlak a ni a. March ni 28,2023 a SDG Symposium neih zawh taka pakhatna Govt. Hnahthial College (Repacking & Rebranding of Darzo Tea) leh pahnihna Govt. Hrangbana College (Hydroponic Fodder) SDG Team te'n powerpoint presentation an pe a. Pi Biakthansangi Hrahsel, Deputy Adviser-cum-Deputy Secretary, Planning & Programme Implementation Department chuan lawmthu sawiin hun hman hi a khar a ni.