1463/2023-2024
2023 Thlazing ni 11: Vawiin khan Lawngtlai Deputy Commissioner (DC) Office-ah a duh apiangte'n Electronic Voting Machine (EVM) hmanga vote an thlak chhinna tur leh EVM kaihhnawih thil pawimawh hrang hrang inhrilhfiahna tur hmun, EVM Demonstration Centre chu Lawngtlai District Election Officer Pu H. Lalhmingthanga chuan a hawng.

Hawnna inkhawm, EVM Nodal Officer Pu Samuel Lalmalsawma Sailo, SDC Lawngtlai kaihhruaiah District Election Officer Pu H. Lalhmingthanga chuan inthlanna felfai leh dik a awm theih nan official-te hma lakna chauh a tawk zo lo tih sawiin, political party leh mipui lam ṭawiawmna leh thawhpuina a ngen a. EVM hmanga inthlanna felfai, dik leh samkhai zawk neih a ni ṭhin chu a zangkhaithlakin, India ramin EVM hmanga inthlanna a kalpui ṭhin chu khawvel ram dang pawhin an zir chiang nasa tih a sawi a. Vote thlaktute'n dik taka vote an thlak theih nan vote thlakna hmanrua hman dan hriat chian a, lo chul nel hmasak chu a pawimawh tih sawiin, a bikin ṭhalai vote nei tharte'n ngai pawimawh se a duh thu a sawi a. Lawngtlai District mipuite chu EVM Demonstration Centre chu hman ṭangkai tum ṭheuh turin a sawm a ni.

Pu H. Lalhmingthanga chuan Mizoramah kum 2003 khan MLA inthlannaah EVM hman ṭan a ni, a ti a. India ram pumah sawiseltu lamte'n EVM chu sawi hnawm tum viau mah se, Election Commission of India (ECI)-in sawi hnawmtute'n EVM rin tlak lohna an hriatte sawitirna hun a buatsaih ṭhinah tu mah an koh hun dik taka kal an la awm lo va; hei hian EVM chu a rin tlak a ni tih a lantir avangin India ram chu EVM hmanga inthlanna a kalpui ṭhinah a inchhuang hle a ni, a ti.

Election Officer Pu Denny Lalchhuanawma chuan EVM Demonstration Centre chu Lawngtlai District chhunga block headquarters dang pathum - Sangau, Chawngte leh Bungtlang South-ah te pawh hawn thuai tum a ni, a ti a. He'ng centre-ahte hian a tahtawlin school leh pawlho angte pawhin vote thlakna hmanrua an belh chian theih nan ruahmanna siam chhoh tum a nih thu sawiin, EVM Demonstration Centre chu a duh apiang tan office hun chhungin vote thlak chhin nan hman theih reng a ni, a ti a. Sector Officer ṭhenkhatte'n an bial chhunga polling station-ahte EVM hman dan hi mipui an zirtir tawh tih sawiin, hei pawh hi a remchan dana kalpui chhunzawm zel tura ruahman a nih thu a sawi.

Vawiina Lawngtlaia EVM Demostration Centre hawnnaah hian sawrkar official-te, political party hruaitute leh election kaihhnawiha mawhphurtute an tel a. Kal khawmte chuan vote an thlak chhin nghal bawk a ni.

Attachment

  • Loading attachment...