1464/2023-2024

Mamit 11th August, 2023 : Vawiin khan Sports & Youth Services Department leh Mizo Zirlai Pawl (MZP) tangkawpin an buatsaih Youth -20 Meet on Nationalism, Patriotism & Development chu Seminar Hall, Govt. Mamit College-ah Er. H. Lalzirliana, Bialtu MLA/ Vice Chairman, Road & Infrastructure Development Board chuan a hmanpui.

Er. H. Lalzirliana chuan mizo thalaite kan nihna-ah kan chiang tur a ni a, Pathianin duhtakin mizo fa ni turin min dah a, tu mah an tuma buai tur kan ni lo, kan nihna hi lawm takin kan pawm tur a ni a ti. Tunlai thalai lar duhnate, Social media-a mi sel ngawt tumte kan tam ta hle a, a phawvuak leh a tak nilo-ah hian kan buai tur a ni lo a ti.

MLA chuan kan pi leh pu, kan thlahtute'n ram tha tak min hnutchhiah hi humhim ila, hei bak hi ramdang kan neilo a, a siamtha tur pawhin midang an awmlo, mizo thalaite ruihhlo leh a kaihnawih hrang hrangah buai hman kan ni tawh lo a ni tiin, ram leh hnam tana ngaihtuahna seng a, tan la sauh sauh turin kalkhawmte a chah a ni.

He hunah hian Pu Lalhruaitluanga Chawngte, Adviser MZP General Hqrs pawhin thu sawiin thalaite chu ram leh hnam hmel tidanglam theitu leh nakin zela ram hruaina pawh chelh tur kan nih avangin mi hmantlak leh rintlak kan nih a tul thu a sawi a. Dr. MS Dawngliana Hnamte, Principal Govt. Mamit College pawhin thusawina a nei bawk.

India ramin G-20 Presidency a chelh chhunga hmalakna pakhat Youth - 20 programmes chu Mizoram hmun hrang hrangah hman chhoh mek a ni a, thalaite leh zirlaite chu ram leh hnam tana mi chhenfakawm ni tura chherchhuah leh rilru dik nei a, ram leh hnam hmangaihna tak tak nei tura inbuatsaihna tur atan te hmalakna hi kalpui a ni.

Youth - 20 Meet hi Michael Lalramsanga Vice Chairman, Y-20 Organising Mizoram chuan kaihruai-in, Y-20 chungchang sawizauna a nei a. Tv. Zobiaksanga, President MZP Hqrs. chuan lawmthu sawina a nei bawk.