1465/2023-2024

Aizawl 11th August, 2023 : Dr. R. Lalthangliana, Health & Family Welfare, Higher & Technical Education leh Commerce & Industry changtu Minister chuan vawiin khan a Office Chamber MINECO -ah Khawivah chanchin leh a khawi dan tih lehkhabu Pu Malsawmtluanga ziak chu a tlangzarh.

Minister chuan Khawivah chanchin leh a khawi dan lehkhabu tlangzarh a ni thei chu lawmawm a tiin Khuai khawi lama tuimi te tan a tangkai ngei a beisei thu a sawi a. Khawivahzu chu khawizu tui leh hriselnan pawh a tangkai tak a ni tiin kan ramin khawizu intodelh na kawngah min pui ngei a beisei thu a sawi.

MBKA hruaitute chu Khuai khawi dan leh chhungkaw chawm nana a hmantlakzia Social Media leh Print Media-ah te thehdarh thin tura chahin vawiina lehkhabu tlangzarh tak pawhin Khuai khawi lama tuimi te hnen a thlen ngei theih nana tan la tur leh Mizo tawng chauh ni lo, English pawha letling turin MBKA te chu a ngen a. Sorkar pawhin mi taima leh tuichilhtute, tih tak taka ti thin te chu puih a tum ber anih thu a sawi bawk.

He hunah hian Pu Lalsawmliana Sailo, Development Officer, MKVI Board, Pu C.H. Lalmuanpuia, Director, Horticulture Dept. leh Pu PS Lalengzauva, Asst. GS, MBKA te'n thu an sawi bakah Lehkhabu ziaktu Pu Malsawmtluanga'n a lehkhabu ziah chanchin leh lawmthu a sawi bawk.

Vawiina lehkhabu tlangzarh tak hi Copy 500 siam niin a man hi Rs. 200/- a ni a. Tlangzarhna programme hi Pu MC Lalthankima, President, Mizoram Bee Keepers Association-in a kaihruai a. He hunah hian MBKA hruaitute leh khuai khawi lama tuimi te bakah sawmbikte an tel a ni.