Eizawnna hna peng hrang hrang atan thalaite chhawr tlaka buatsaih turin UN Joint Initiative Project hnuaia skill development kalpui dan tur ngaihtuahin vawiin khan Chief Secretary Pu Lalmalsawma IAS hovin NLUP Implementing Board leh sorkar department hrang hrang hotute chu Chief Secretary conference hall-ah an thu khawm. Skill development lama hma thar lak nan UN Joint Inititive Project hnuaia ILO leh UNIDO te hman tangkaina tur leh ruahmanna siam dan tur kawngte an sawi ho.

Chief Secretary Pu Lalmalsawma chuan India ram puma thalaite dinhmun tlangpui tarlangin naupang kum 6-16 inkar vaibelchhe 30 zinga 10% chauh hi school zirna zo thei tura chhut an ni, a ti a. Kumtin hnathawk thei rual mi nuai 130 zinga 25% chu Primary education zir zo an ni tiin 45% chu ziak leh chhiar thiam lo an ni a, organised sector a hna thawk chu 10% chauh an ni, a ti a. Kum 2020 ah India ram mihring awm zawng zawng zinga 60% vel chu hnathawk thei tura chhutin sorkar laipui chuan kum 2020 ah hian thalai maktaduai 500 chu thiam thil neia hna thawk thei tura buatsaih chu policy pawimawh takah a nei mek a ni, a ti a. Mizo thalai hna thiam bik nei lo ten eizawnna an neih theih na tura skill development lamah tan lak nasat a tul thu sawiin Pu Malsawma chuan awmze neia skill development kalpui turin hemi kawnga Mizoramin tlakchham a neihte ngun taka hriatfiah hmasak a tul a ti a. Ram mamawh leh a hun mila skill development kalpui turin department hrang hrang te chu an finna leh hriatna te thawh khawm a, ruahmanna mumal tak duan leh tan lak tlan a pawimawh tih a tarlang a ni.

Skill development chungchanga hmalakna turah hian NIB Vice Chairman Pu P.L.Thanga leh Planning Secretary Pu Vanlalramsanga te pawhin eizawnna hna hrang hranga Mizoram leh Mizo thalaite dinhmun tarlangin hmalakna tura an ngaih pawimawh lai te an sawi bawk ani.

Vawiin meeting ah hian department hrang hrang ten skill development programme leh scheme an kalpui dan te ngaihthlak a ni a. Hemi kawnga Mizoram mamawh leh tlakchham neih te sawiho a niin awmze neia skill development kalpui turin tunlai dinhmun mila zir tur syllabus siam that te, hna peng hrang hranga thawktu indaihlona leh thawktu mamawh dan zirchian te, training course chhunga internship period neih a pawimawhna te, skill development atan department hrang hrang te hmalakna inthlunzawm a pawimawh dan te sawiho a ni a. Vawiina sawihona atang hian UN Joint Initiative Project hnuaia skill development kalpuina tur ruahmanna duan chhunzawm a ni dawn a ni.