Chhandamtu Pian lawmna atana Krismas 2014 leh Kumthar 2015 denchhena Aizawl khawpui huam chhung veng hrang hrang cheimawi chu sorkar-in a endik hnuah ‘Certificate of Appreciation’ chu vawiin chhun dar 12 khan Central YMA Hall, Tuikhuahtlang-ah Home Minister Pu R. Lalzirliana’n a hlan.

Veng leh Kawn cheite hi Krismas leh Kumthar lawmna peng pawimawh tak a lo ni ta in, mite ti hlimtu leh ti phurtu lo ni chho zel thei sela tiin khuallian Pu R. Lalzirliana chuan Mizoten kawng hrang hrang in hma kan sawn chho zel a, tunah chuan Kawn cheina hmun a zu rui buai leh buaina siama insual an awm tlem tawhin, zu in chu an awm, mahse mi pawisawi hlau takin an awm a. Krismas leh Kumthar kan hman dan result pawh a fim sawt hle a ni tiin Pu Lalzirliana chuan Lal Isua Piang lawm nana kan veng kan chei hi a lawmawm a, cheimawina atana sum sen te chu lawmman ah kan pe let seng dawn lova, mahse sorkar in a hriatpuiin a hlutpui a ni tih lan tir nana a hminga hriatpuina leh lawmthu sawina atana lawmman chu siam anih thu a sawi a. Vengchhung miten Lal Piang lawm nana thinlung hawnga in sengsova lawmna an lantir chu lawmthu a sawi bawk. Chei leh hunah chuan Lal Isua zia lanna lam tarlan tam theih nise a duh thu a sawi bawk.

Mizote hian zirtur kan la neih thu sawiin Minister chuan hun hman dik chu kan tih tur ngei ngei a ni a, a bikin YMA member te phei chuan kan ngaih pawimawh a tul a, traffic jam thin chu chhuanlam tha tak a nih rualin traffic hi chu a jam reng a, mahni lam insiam rem a ngai, ‘Tumna a awm chuan kawng a awm a ni’ tih chu Mizo ten kan hriat nawn fo a ngai a ti a. Kum dang aia Halphuah ilo hal nasat a nihna kawngah pawh hun lo kal leh ah chuan YMA leh mipuite nasa zawka tangruala sorkar an thawhpui a ngai a ni, a ti bawk. ‘Thian chhan thih ngam’ kan pipu ten an lo ngaihsan thin chhunzawm zela, mi mangang tanpui vatin, nunaute thlamuan thei a che vat zel turin kalkhawmte leh YMA member te chu a sawm a ni.

Veng leh Kawn chei lawmman semna hi Aizawl DC Dr. Franklin Laltinkhuma IAS in a kaihruai a, Pu Lalbiakzama, MPS, Addl. Secretary Home Department chuan report a pe a ni.

Vengchhung chei endikna hi category A, B leh C ah te then a ni a, Category A ah hian Bethlehem, Armed Veng, Chanmari, Saikhamakawn, Kulikawn, Khatla, Bungkawn, Bawngkawn South, Chaltlang leh Ramhlun North te niin Rs. 10,000/- theuh an dawng a; Category B ah hian Bethlehem Vengthlang, Chhinga Veng, ITI Veng, Zarkawt, College Veng, Bawngkawn, Durtlang Leitan, Tuikhuahtlang, Thakthing, Mission Veng ‘S’, Hlimen, Chawnpui leh Dinthar te niin Rs. 7,000/- theuh an dawng; Category C ah hian Electric Veng, Salem, Maubawk, Vaivakawn, Luangmual (Chhangurkawn), Sakawrtuichhun, Zotlang, Melthum, Mission Vengthlang, Mission Veng ‘N’, Venghlui, Sihphir Arpu Veng, Sihphir Venghlun, Durtlang Mual Veng leh Sarawn te niin Rs. 5,000/- theuh an dawng bawk a ni.

Armed Veng, Kulikawn, Mission Vengthlang, Khatla leh Bethlehem veng te hian concert siam avangin Rs. 16,000/- theuh an dawng a ni.