4263/2025-2026

Dated Aizawl, the 3rd February, 2026: Vawiin khan Pu Khilli Ram Meena, Chief Secretary, Government of Mizoram hovin State Level Empowered Committee (SLEC) chu Conference Hall No. 1, New Secretariat Complex-ah an thukhawm a. Sansaad Adarsh Gram Yojana (SAGY) hnuaia project la zawh loh 80-te chu paih turin an rel.

SAGY hi thingtlang khuate tihhmasawnna tura October 2014 atanga India sawrkar laipuiin a kalpui tan a ni a. He scheme hnuaiah hian Member of Parliament (MP)-te’n thingtlang khua an thlanchhuaha hmasawnna ruhrel huap zau tak – khawtlang tan, hnam tan leh ram hausakna tihchangtlun nan mawhphurhna an la a. 2016 thleng khan MP tinin Gram Panchayat (Village) pakhat a thlang a, khaw entawntlak (model village)-ah a chhuah a. 2019 thleng khan MP tinin khaw pahnih dang an enkawl leh a, 2024 thlengin kumtin khaw pakhat an enkawl bawk a ni.

SAGY thil tumte chu:

• Khaw thlanchhuahte huap zau taka tihhmasawn a, Adarsh Gram/Model Village (khaw entawntlak)-a chhuah.
• Khaw mite, a bik takin rethei leh endawngte nun leh eizawnna quality tihthat.
• Vantlang mipuite hnena mipui telna hmasawnna bakah langtlang tak leh mawhphurhna la ngama hnathawh zirtir.
• Khaw entawntlakte chu khaw dangte’n an hlawhtlinnate an entawn theih nan ‘hmasawnna zirna sikula’ siam.

SAGY hi Mizoramah pawh kum 2014 atang khan hman tan a ni a, a hnuaiah hian MP-te’n Gram Panchayat (GP) 14 chu Adarsh Gram (Model Village) atan an thlangchhuak a ni.

GP tinte’n vantlang mipuite rawnin Village Development Plan an siam a. A vaiin VDP hnuaiah project 816 awmin, hmasawnna thlur hrang hrang – infrastructure, education, health, livelihood, sanitation leh social inclusion-te a huam a. He’ng project 816 zinga 736-te chu hlawhtling taka zawh a ni tawh a. A tirah chuan kum 2024 hma ngeia project zawng zawng zawh tum a ni a. Amaherawhchu, hemi hun chhung hian harsatna hrang hrang avangin project thenkhat chu zawh theih a ni ta lo a. Heti chung hian Mizorama SAGY kalpui dan chuan hmasawnna awmze nei tak leh ‘holistic rural development’ ngaih pawimawhna lian tak a awm tih a lantir a. Khumtung, Mualcheng, Muthi leh Damparengpui-ah phei chuan project zawng zawng zawh fel a ni.

He'ng project 80 paih tura remtih takte hi zawh an nih theih tak loh chhante chu:

• A tira tum san lutuk vang: SAGY hman tirh khan khaw mite leh a enkawltu official-te kha an phurin an tum sang mah mah a, VDP hmasa lamah project tam uchuak rin luh a ni.
• Sum lama harsatna a lian ber: SAGY hian budget hran a nei lo a, chu vang chuan VDP hnuaia project tam takte chu tan emaw zawh an ni thei ta lo a ni.
• Departmental scheme lama harsatna: Line department hrang hrang hnuaia scheme kal lai, SAGY nena thlunkawp tura duanahte fund a tam tawk lo a, hei vang he’ng department-te tan VDP hnuaia project belhchhahte kalpui a remchang lo a ni.

Ministry of Rural Development, SAGY Division chuan August ni 7, 2023 khan SAGY portal-a VDP hnuaia project paih phalna a pe a. Gram Sabha, District Level Committee (DLC) leh State Level Executive Committee (SLEC)-te remtihna lak hmasak a ngai thung a. Mizorama SAGY khaw hrang hranga Charge Officer-te chuan Gram Sabha leh DLC atangte hian remtihna an la fel tawh a. Vawiina SLEC-in project 80 paih a rel takah hian Ministry-in July ni 31, 2025 hmaa SAGY hnuaia project-te zo fel tura thu a pek zawmin Mizoram chuan SAGY hmalaknate kim tak leh hlawhtling takin a khar thei dawn a ni.

Current Status of SAGY in Mizoram.pdf