4262/2025-2026

Dated Aizawl, 3rd February 2026: Vawiin khan Department of Environmental Science, Pachhunga University College leh Society for AgroEnvironmental Sustainability, Dehradun, Uttarakhand te tangkawpin an huaihawt, ni hnih awh tur ‘International Conference on Recent Advances in Environmental Research, Biodiversity Conservation and Sustainable Development” tih chu Pachhunga University College Auditorium-ah a khuhhawnna hun hman a ni a. Public Works Department Minister Pu Vanlalhlana chuan khuallian niin Conference hi a hawng a, Higher & Technical Education Minister Dr. Vanlalthlana chuan khualzahawm niin hun a hmanpui.

PWD Minister chuan International Conference on Environmental Research, Biodiversity Conservation and Sustainable Development huaihawt a ni chu lawmawm a tih thu sawiin, ramngaw leh nungcha tih chereu nasat avangte leh sik leh sa inthlak danglam nasat avangtea harsatna hrang hrangte hian khawvel a nghawng a ni mai lo va, khawtlang nun, eizawnna leh thangthar lo la awm leh zel turte thleng tan a chhe zawnga nghawng tha lo nei thei a nih avangin, ram hmasawnna hna thawh leh environment humhalhte hi inkhuangrual taka, fimkhur taka kalpui a ngaih thu a sawi a. Ram hmasawnna hna thawk tak tak tur chuan kawng laih te, in lian tak takte leh infrastructure hrang hrangte din a ngaih thin thu sawiin, chutiang ti tur chuan ram ngaw, thing leh mau ten an tuar chang a awm fo thin thu a sawi a; chuvangin hun lo awm leh zel turah pawh inkhuangrual taka development leh environmental conservation te hi kalpui a nih zel theih nan, zirlaite leh researchers-te chu nasa lehzuala zirbingna kalpui tura chahin, an thiamna leh theihnate ram tana hmang tur leh sawrkar thawhpuitu ni turin a sawm a, International Conference an hman tur pawh hlawk taka hmang theuh turin duhsakna a hlan nghal bawk a ni.

Khualzahawm Dr. Vanlalthlana pawhin thu sawiin, tun chhuante chauh ni lo, chhuan lo la awm lehzel turte tana chennatlak ram nuam leh hrisel nei turin zirlaite leh hmasawnna hna duangtu ten tangruala, uar lehzuala zirbingna kalpui deuh deuh a ngaih thu a sawi a. Environment humhalh kawnga sawrkar hmalakna hrang hrangte sawiin Mizorama zirna kalphung pawh tha lehzuala kalpui a nih theih nan hma lak mek a nih thu a sawi a. Zirlaite’n a hun leh hmun leh thil awm dan azira ngaihtuahna zau zawk hman thiam theihna, Innovative thinking an neih theihna turin hma lak mek a nih thu a sawi bawk. Conference chhimtu zirlaite leh researchers-te chu an zirlai mai piah lamah, ram leh hnam vei tura chahin Central Schemes leh hmasawnna hna hrang hrang thawh danahte pawh, thil nihna dik tak hrechiang a, dan bawhchhiatna awm theite lakah pawh sawrkar venpuitu ni turin, RTI hman tangkai nachangte hre deuh deuh turin a chah bawk a ni.

Vawiin hun hmanna hi Dr. Kulendra Chandra Das, HoD, Dept of Environmental Science, PUC chuan kaihruaiin, Dr. Hilda Lalrinpuii, Asst. Professor, Department of Environmental Science, PUC chuan Conference chungchang sawi zauna a nei a. Prof. H. Lalthanzara, Principal, PUC chuan inlawmna thu sawiin, Dr. Lallawmkimi, Asst Professor, Department of Environmental Science, PUC chuan lawmthu sawiin hun hi a khar a ni.

He International Conference hi online leh offline mode-a kalpui niin Mizoram mai bakah, ram pawn atangtein zirlai leh mi thiam rualte’n Environment, Biodiversity leh Sustainable Development chungchanga thupui chi hrang hrang thlanchhuahte hmangin, thu sawi leh  zawhna leh chhan hunte an hmang ho dawn a ni.