4261/2025-2026

Aizawl the 3rd February 2026: Vawiin khan Falkland Park, Aizawlah Health & Family Welfare Department hnuaia Mizoram Health Systems Strengthening Project buatsaih Knowledge Exchange Health Conclave, ni hnih awh tur chu Chief Minister Pu Lalduhoman a hawng.

Thusawiin Chief Minister chuan, Mizoram sorkar hian mipuite hriselna hi ram hmasawnna zelna atana thil pawimawh tih a hriat avangin mipuite hriselna lamah nasa takin hma a la a. India rama health care system tha ber pawl Mizoram Universal Health Care Scheme a duang chhuak a. Empanelled Hospital kaltlangin cashless-in damlote chu enkawl an ni. Kan hriselna hmunhmate nasa takin kan thuam tha a, district hospital te, CHC leh PHC te kan thuam tha a. Kan thawktute tan khawl changkang tak tak kan lei a, hriselna lamah hmasawnna thar kan thawk nasa hle. Heng hmalakna tam takte hi Mizoram Health Systems Strengthening Project kaltlanga kan thawh te an ni a. He hmalakna kan neih theihna bul World Bank chungah leh central sorkar chungah kan lawm hle.

Vawiinah India ram state hrang hrang atanga mipui hriselna lama mithiam lo kal khawmte nen knowledge exchange kan nei dawn a. He conclave zarah hian hmalakna tur tha zawk leh hriatna zau zawk kan neih kan beisei a, India ram tana kan thawhhonaah te, hma thar kan lak zelna atan te a tangkai dawn a. Hlawk taka hman kan tum theuh dawn nia, a ti a. Conclave buatsaihtu MHSSP chungah lawmthu a sawi a ni.

Chief Minister hian Coffee Table Book a tlangzarh nghal a ni.

Pi Lalrinpuii, Health Minister pawhin thusawiin MHSSP kal tlang hian kan damdawiin leh Centre te kan thuam tha nasa a, khawl thar tam tak kan lei a, tangkai taka kan hman avangin India rama damdawi tha (quality) certificate dawng thei pawh kan neih phah nual a ni, a ti.

Mizoram Health Systems Strengthening Projects hi World Bank sum hmangin kum 2021 khan kalpui tan a ni a. Kum nga chhung kalpui tur a nih angin kumin March thlaah hian a tawp tawh dawn a ni.

Dr. Lily Chhakchhuak, Project Director, MHSSP chuan an hnathawh dan tlangpui a sawi a. Project cost hi Rs. 280 crore a ni a, kumin January thlaah khan Project Development Objectives panga zinga pali chu an tihlawhtling fel a, Intermediate Result Indicators target 16 zinga 14 an hlen tawh bawk a. Target hmabak la awm te chu kumin March thla ral hmaa hlen vek an inbeisei. An hmalak zinga langsar ber pakhat chu March 2025 a Mizoram Universal Health Care Scheme tlangzarh a ni kha a ni a. MUHCS hnuaia enrolment target hi zaa sawmkua leh pakhat (91%) an tihlawhtling a ni. Hna an thawh that avangin National Health Authority chuan tun January thla khan Best Performance in Achieving Card Saturation lawmman a rawn hlan a ni.

Ni hnih awh tur tawnhriat inhrilhtawnna (knowledge exchange conclave) hmang tur hian India ram state hrang hrang; Telanagana, Meghalaya, Nagaland, West bengal, Assam, Tamil Nadu, Gujarat, Sikkim, Arunachal pradesh aiawh mithiamte bakah Gates foundation leh NEC aiawhte an rawn tel a ni.