3838/2022-2023

Aizawl, 14th March, 2023 : Union Home Minister Amit Shah tun thla tawpa Aizawl rawn zin tur chungchanga inpuahchah dan tur Chief Secretary Dr Renu Sharma hovin sawrkar hotu pawimawh ten vawiin chawhnu khan Chief Secretary’s Conference Hall-ah an rel.

Union Home Minister Amit shah hian tun thla tawp March ni 31, 2023 (zirtawpni) hian Aizawl a rawn tlawh dawn a, Zokhawsanga Assam Rifles complex a hawn bakah AR Ground sir a Laldenga Cultural Centre sak tur lungphum a phum bawk ang.

Vawiin meetingah hian Zokhawsanga Assam Rifles Complex satu contractor Engineering Projects (India) Limited pawh telin, anni hian an hnathawh hrang hrang component 13 an zawh vek thu leh quarters thenkhat Assam Rifles hnena hlan chhawn tura an pek tawh, Assam Rifles lamin an lakchhawn theih rih loh chiah mutan an neih thu an sawi a, Assam Rifles aiawh meetinga telte leh state sawrkar officialte nen sawiho a nih hnuin naktuk March ni 15, 2023 chawhnu dar 2:30 ah a hmunah a huhova endik tum a ni a. Hemi hmuna Union Minister hova official function neihna tur hmunhmate pawh enfel nghal tum a ni.

AR Ground hmar lama Laldenga Cultural Centre sak tura ruahmanna siam mek chu Aizawl Smart City Project hotuten powerpoint hmangin an sawifiah a, cheng nuai 193 senga sak tura ruahman niin 75 metre x 90 metre a zau a ni ang.

Chief Secretary chuan hun chep tak karah fimkhur tak leh uluk taka ruahmanna siam a tul avangin theihtawp chhuah theuh turin kalkhawmte a chah a ni.