Vawiin chawhma khan Vanapa Hall ah Mizoram State Cooperative Union leh Cooperation department tangkawp buatsaih 66th All India Cooperative Week, 2019 kharna hun hman a ni a, Pu Lalnunmawia Chuaungo, IAS, Chief Secretary, Government of Mizoram chu khuallian niin Pu JP Agrawal, IAS, Secretary, Cooperation Department chu khual zahawm a ni bawk.

Khuallian Pu Lalnunmawia Chuaungo chuan Mizoramah Cooperative Society vanga hmasawnna thleng mek chu lawmawm a tih thu sawiin Mizoram Cooperative Apex bank pawh Mizoram chhunga bank hna thawk tha ber pawl dinhmun luahtu a nih mek thu a sawi. Khuallian chuan Cooperative Society chu hmasawn tumna kawnga duh zawng leh tuina inang mi hrang hrang kal khawmna a nih avangin pawl tha leh chak tak a nih thu a sawi a, hmun kilkhawr zawk thleng phak hmasawnna hna thawktu pawimawh tak an nih thu a sawi bawk. Chief Secretary chuan Cooperative Society chu induhsak bik awm lohna leh rual khai taka in dawm tawnna pawl a nih thu sawiin hlawhtlin tuma bei tak tak te zirchian a, a tul huna puitu ni thin turin hruaitute chu a chah bawk a ni. Pu Lalnunmawia chuan mahni tana tha tur leh hlawkna turah chuan Sawrkar inrawlh ngailo a mahni phak tawk a hmalak tum ve a tul thu sawiin chutiang ang rilru pu a neitu nihna thinglung nen thahnem ngai tak a hmasawnna hna thawk thin turin kalkhawm te a fuih bawk a ni.

Khual zahawm Pu JP Agrawal pawhin thu sawiin Cooperative Society ah mizo thalai lehkhathiam tam zawk lut tur a a duh thu a sawi , a Mizoram chu khawtlang inpawh tak leh inthliarna awm lo a nih avangin Cooperation anga hnathawhna hmun nuam tak a nih thu a sawi bawk a ni.

Vawiin All India Cooperative Week kharna hun hi Pu K Lalchamreia, President, MSCU in a kaihruaia, Mizoram Chief Minister Pu Zoramthanga, Pu C Lalrinsanga, Cooperation department Minister leh Dr Chandra Pal Singh Yadav, President, National Cooperation Union of India ten Cooperation week puala thuchah an ziah te ngaihthlakna hun hman a ni a. Cooperation Flag pawhpharhna hun leh Tlaugau Special edition lehkhabu tlangzarhna hun Khuallianin hmangin Cooperative Society engemawzat ten an thil siam te lei theihin an phochhuah bawk a ni. Cooperation department-a thawktute tarlan danin State level Cooperative Society 11 leh Primary level cooperative society 1173 a awm mek a ni.