Vawiin chawhma dar 11 khan Pu Lalmalsawma, Chief Secretary chuan Mizoram Deputy Commissioner zawng zawng kangmei chungchangah Video Conferencing a neih pui.
He hunah hian DC tinte chu an bial chhung theuh ah tun thal lo thleng mekah hian kangmei ven kawnga nasa taka hma la turin a fuih a, Lo/ Huan hal hun Sorkarin a bithliah March 15 hma ngei a khawtinte Lo/ Huan hal fel tura hma la turin a fuih a ni. Tunlai khawvel changkangah Satellite in kangmei chhuak te thla la in report a rawn thawn zel a, chuvangin ramkang report chungchangah pawh dik tak leh fimkhur taka hma la theuh turin a fuih bawk. Tin, Dan kan neihsa te hmang tangkai tur leh dan lek kawh chungchangah pawh hma tha taka lak a tul thu te, mipui zirtirna uar zual turte leh Police te pawh FIR thehluh bawhzui tha tura lo hriattir turin a hrilh bawk.
Kangmei chhuah leh ven chungchangah kum kalta aia kuminah hmasawnna nei theuh turin a sawm a, report kimchang Sorkara thehlut turin a hriattir bawk.
Chief Secretary chuan Dan kan neih lai hmangin engti kawng pawha kangmei chhuak venghim turin a hriattir a ni. Tin, kangmei hi Lo hal hma leh Lo hal hnuah pawh kangmei hi a chhuah theih reng avangin Chief Secretary chuan Fire Prevention Week hma leh hnuah District tin a District Level Fire Prevention Committee ten Meeting an neih tur a ni a, hei hi kangmei chhuah dan monitor na atan a pawimawh tih a tarlang bawk.
Pu Lalram Thanga, IFS, Principal Secretary, EF&CC, Mizoram pawhin DC tinte hnenah District Administration te, DFO te, NGO te leh mipuite tan hona a pawimawh thu sawiin, a bik takin jhum burning day kenkawh chungchangah DC tinten thupek kengkawh a tul thu a tarlang a, tin, District tin a Police hotute pawhin kangmei chungchanga thupek zawm lo leh dan bawhchhiate chunga FIR submit a nihin arang thei anga bawhzui turin a ngen bawk. Hei bakah hian Lo leh huan hal tuten meikawng (fire line) uluk taka siam a pawimawh thu a tarlang bawk. He Video Conferencing ah hian DC tin te concerned Department Officer te hnen atangin kangmei ven chungchanga District tin te hmalakna pawh ngaihthlak a ni.
