Vawiin hian Serchhip District Fire Prevention Committee chu an Chairman leh Bawrhsap ni bawk Dr. Lalrozama, IAS hovin an thukhawm a, Fire Prevention Week, 2017; Dt 6^th -11^th February hman dan tur leh kumin thal chhova District chhunga ram kang a awm loh nana hmalak dan tur hrang hrangte an rel.

Chairman Dr. Lalrozama chuan, sawrkar in ram kang hi a ngai thutak hle a, Serchhip District ah pawh sawrkar dan bawhchhiaa ram tikangtute, a hun bithliah pelh hnua Lo leh huan hal tute chungah dan ang taka hmalak ngei a ni dawn tih a sawi a, sawrkarin ram kang chu National Calamity tlinga a pawm tak avangin ram tikangtute kan en liam mai mai dawn lo a ni, a ti. State Level Fire Prevention Committee in kumina Lo/huan hal hun atan March ni 15 hma lam zawng a bithliah tih sawiin, ram kang laka him leh hma la tha khuate hnenah District Level inelna a awm leh tur thu te, District inelna pawh buatsaih a nih leh tur thute a tarlang a. Kumina Fire Preventioan Theme atana “Ram tikangtu- Ram hmelma” tih chu State Level Committe in a thlan thu a sawi bawk.

Vawiina meeting chuan District chhung khawtina khawng taka ramkang laka invenna kalpui dan tur ruahmanna a siam a, YMA, Village Council leh khawtina sawrkar hnathawk awm ang angte hman tangkaia hmalak dan tur a duang bawk. Tin, suahsual vangte, mautuai thar hmasa it mai mai vangte, ranchaw chawr hma tir duh vang mai mai te a ram halchingte zawnga, a ruka enthlatu tur leh thuneitute hnena report tu tur pawh khaw hrang hrangah dah an rel a ni. Khawtina YMA chanchinbu hman tangkai dan turte, District chhunga Cable TV awm ang ang hman tangkai dante, nitin chanchinbua nasa zawka mipuite zirtir dan tur ruahmanna te pawh a siam a, kum dang ang bawkin Newspapers leh Cable TV te tan inelna buatsaih leh nise a ti bawk.

Heng bakah hian District chhunga National Highway leh State kawngpui kam, awlsam taka meia dehkai mai theih chi zawng zawng; thal khawro zual hmaa samfai tura thuneitu lama thlen te, khawtina hnawmpaihna hmun meilam sial lova hal lo tura inhrilh te, lirtheia chuang thinte hnena ngenna siamte leh kawng hrang hranga hmalak dan tur an duang a ni. Fire Preventioan Week hawnna inkhawm bik chu 6.2.2017 chawhnu dar 1:00 ah DC Conference Hall a neih nise tiin an rel.

He meeting ah hian Pu Lallianzuala, DFO Thenzawl, Member Secretary, Serchhip District Fire Prevention Committee chuan kum hmasa lama hma lak dan leh kumina State Level Committee thurelte sawifiahna a nei a, hmalak dan tur agenda engemawzat a chhawpchhuak bawk.

He meetingah hian Serchhip SP Pu Lalringdika, MPS leh District Level Committee member te an tel a ni.