Vawiin khan Chief Minister Pu Lal Thanhawla chuan Social Welfare Department enkawl Hunthar Venga awm Protective Home complex, building pali sak thara tihchangtlun, hawnna programme a hmanpui a. Heng building thar - Administrative building, Common Facility Centre, Protective Home (Hostel), Nurse quarter leh Superintendent quarter te hi North Eastern Council (NEC) atanga hmuh sum cheng 275.72 lakhs senga sak niin, a sak hna hi Lushai Engineers in a thawk a ni.

Chief Minister Pu Lal Thanhawla chuan chhan hrang hrang avanga vanduaina tawk leh humsual dai hmeichhia te enkawlna leh nun kawng dik an zawha eizawnna kawng an neih theihna hmun Protective Home tihchangtlun a ni chu lawmawm tiin he hmun leh a thawktute kaihhruainain Home a awm ten nun kawng pangngai an zawh ngei a duhsak thu a sawi a. Mizoram tan moral leh social reformation a pawimawh thu sawiin he thil hi Kohhran leh tlawmngai pawlte kutah chauh dah a tawk lova, political party ang pawhin hma lak dan ngaihtuah chu tha a tih thu a sawi a. Home enkawltu te mawhphurhna a san thu sawiin heng mi chanhai leh chhungte pawhin an ensan te tan in thawhrimna leh in inpekna nen an nunah malsawmna nia, eizawnna kawng te zirtir zel turin ka chah duh che u a ni, a ti bawk.

Chief Minister chuan hmuhsitna leh endawngna karah malsawmna leh hlawhtlinna a awm dante sawiin midangte tan rinna, taihmakna, dikna leh Pathian tihna nen rawng kan bawl a, eng hna pawh thawk ila, min hunna apiang hi a rawngbawl tura min dahna ani tih kan pawm a, hna kan thawh chuan Pathianin mal min sawm zel ani tih hi kan pawm tlan ka duh a, chutiang tur chuan kan ngaihtuahna leh rilru te hman a ngai a ni, a ti bawk. Building sak tharte chu mit a tlung thu sawiin Pu Lal Thanhawla chuan contract hna reng reng tha taka an thawh kaltlangin contractor ten an damlai lung an phun thei a, hei hi an hriat a pawimawh hle a, he hna thawktu ten hun tiam hma a tha taka building an sak zawh chu an entawntlak a ni, a ti. Social Welfare Department hnathawh chuan kawng hrang hranga rah tha a chhuah mek thu sawiin a enkawltu Minister thahnemngaihna leh Department a thawkte inpekna chu lawmawm tiin nasa leh zawka an hna chu rawngbawlnaa ngaia tan la turin a chah bawk a ni.

Programme hi Social Welfare Department enkawltu Minister Pu PC. Lalthanliana’n kaihruaiin Chief Minister leh Sawrkarin Social Welfare Department leh Department hmalakna hrang hrang an phurpui leh an ngaihpawimawh avangin lawmthu a sawi a. Pi Vanlaldini, Director, Social Welfare Department chuan Protective Home chungchang leh an hmalakna te sawiin hun a hmang a, Pu Lalhmachhuana, Architect, Lushai Engineers chuan ‘Upgradation of Protective Home’ hnuaia bulding sak te chanchin tarlangin hun a hmang bawk a. Parliamentary Secretary Pu K. Lalrinthanga’n lawmthu sawina neiin hun a khar a ni. He programme ah hian Assembly Speaker Pu Hiphei, Minister leh MLA thenkhat an tel bawk a ni.

Protective Home hi hmeichhia 30 leh an fate ( kum 7 ai a naupang an nih chuan) len theih na tur a duan a ni a, a din tirh a nih kum 1991 atanga 30th January 2017 tleng hian mi 737 enkawl an lo ni tawh.

Protective Home hi Immoral Traffic Prevention Act, 1956 hnuai a Section 21 hmanga din a nih angin, mipat-hmeichhiatna lam hawi zawng a hum sual lo dai te tan buatsaih a ni. Kum 2015, July ni 9 atang khan sawrkar chuan he Home hi ruih theihthil a harsatna tawk leh ruihhlo ngai hmeichhia te tan inenkawlna hmun ah a puang bawk a ni. Home a an awm chhung hian nun pangai an lo chan chhoh leh theihna turin rilru leh taksa ah enkawlna pek an ni. Ei zawnna kawng a an mahni pui thei tur in puan tah, puanthui, sam/hmai siam leh Computer education ah te zirtirna pek an ni bawk. Computer centre hi chu India Habitat Centre, New Delhi nen tangkawp a din ni a. Superintendent leh Staff 24 ten Home enkawl hna hi an kalpui mek a ni.