2053/2022-2023
Aizawl, 23rd September, 2022 : Chief Secretary Dr Renu Sharma, IAS chuan vawiin chawhnu khan Tanhril-a Food Corporation of India (FCI) Godown leh Govt. Muanna Godown tlawhin Muanna Veng leh Zuangtui-a Fair Price Shop thenkhat a tlawh bawk. Chief Secretary hi FCS&CA Secretary Pi Ramdinliani, MCS leh FCS&CA Director Dr Andrew H. Vanlaldika, MCS ten an tawiawm a ni.

Chief Secretary hian FCI kudam, Tanhril tlawh hmasa berin kudam enkawltute nen inkawmna an neih bakah buhfai dinhmunte enin kudam chhung a tlawh a, FCI kudam in buhfai lo thleng tha lo chungchanga harsatna an neihte leh harsatna leh mamawh dang an neih te an sawiho a, Assam tui lianin Haflong bula rel kawng a tihchhiat avanga an buhfai hmuh tur ang an hmuh theih loh thute, buhfai stock tur an dil pawh a hun taka a rawn thlen theih loh avanga harsatna an tawh nasat thu te an sawi a, a hun taka buhfai a thlen theih loh avangin dilna hi Mizoram sawrkar kaltlanga tihnun thar leh thin a ni a, buhfai Mizoram quota pawh hei hian a nghawng thin thu sawi a ni. FCI kudam, Tanhril hi kum 1998 a hawn niin buhfai tum khatah metric ton 5742 a dahkhawl theih a, tunah hian kudam sawnna turin buhfai metric ton 10,000 dah theihna Sairangah sak mek a nih thu kudam enkawltute hian an lo sawi a ni. Dr Renu Sharma hian FCI kudam bula Supply department site office pawh tlawhin an hnathawh dan kalphungte a enfiah a ni.

FCI kudam, Tanhril, a tlawh hnu hian kum 1986 a sak Zuangtuia Supply department enkawl Muanna kudam a tlawh chhunzawm nghal a, kudam a buhfai dinhmun te a hmunah lutin a enfiah a, hnathawh dan kalhmangte a zawh chian bakah digital weigh bridge bunna turte a endik bawk a ni.

Govt Muanna kudam bula Govt. Fair Price Shop leh Zuangtui- a Fair Price Shop pakhat a tlawh nghal a, buhfai an pek chhuah dan leh an hnathawh dan te a en nghal bawk a, Chief Secretary chuan buhfai semchhuah dan chu felfai tha a tih thu leh lawmawm a tih thu a sawi a ni.