2052/2022-2023
23.9.2022 : Vawiin hian Niti Ayog-ah Sports Minister Pu Robert Romawia Royte leh Mizoram Officials te leh Niti Ayog Member Dr VK Paul leh Central Sorkar Officials ten Mizorama Sports leh Tourism tihhmasawnna tur project an sawiho a. He project hi Rs 2250 crs man lai niin Sports leh Tourism lama hmasawnna ruhrel chi hrang hrang siamna tur a nih bakah training leh sports science lamte a huam dawn a ni.

He project lian hi Home Ministry te, DoNER Ministry te, External Affairs Ministry te, Youth Affairs & Sports Ministry te, Tourism Ministry ten pawmpuina an pe tawh a, Niti Ayog-a a tan rei deuh tak avangin Mizoram Tourism Minister leh a hote hian Power Point Presentation neiin Niti Ayog hotute nen tluang takin an sawiho a. Mizoram Sports Minister chuan Niti Ayog hotute hnenah lawmthu sawiin he project hmang hian Mizoramah world class sports facilities leh tourism infrastructure te siam a ni ang a, Mizoramin economy-ah pawh hma a sawn phah ngei ang a ti.

Vawiin vek hian Sports Minister chuan Minority Affairs Secretary Mukhmeet Singh Bhatia, IAS a kawm a. PMJVK scheme-in kumin atanga Mizoram pum pui a tuam theih tak avanga lawmthu hrilhin sum tam zawk Mizoramin an mamawh tih a sawi a, Mizoram District 11-a district 8 te chu PMJVK Scheme-in a la tuam ve ngailoh; a tuam thar tur an nih avangin kum dang aiin sum Mizoramin a mamawh tam dawn a ni a ti.

Kum 2019-20-a PMJVK sum sanction First Installment chu Mizoram Sorkarin a hmang tha hle tih sawiin, 2nd installment Cheng vaibelchhia 102 (Rs 102 crs) release an dil chu rang taka pechhuak turin a ngen bawk. Sports Minister chuan Mizorama PMJVK Projects thenkhat chu hawn theiha peih a ni tawh a, Union Minister emaw, Union Secretary emaw-in a then chu rawn hawng ve rawh u tiin a sawm a ni.

Minister Pu Robert Romawia Royte hi Pi Manisha Saxena, IAS, Principal Secretary, Pu V.Lalengmawia MCS, Tourism Joint Secretary, Pu Saitluanga, Tourism Director leh Pu John Tanpuia, MCS, MSSC Secretary ten an tawiawm a ni.