No.3202/2021-2022

Aizawl, 30th November, 2021 : Mizoram Florist Association (MFA) buatsaih, Florist Fair chu vawiin khan Aijal Club Park-ah Dr.Renu Sharma IAS, Chief Secretary-in a hawng.

Florist Fair hian December ni 3 thleng a awh dawn a. Fair hawnna ah hian thu sawiin Pi Renu Sharma chuan MFA ten sawrkar tanpuina tel lova Flower Fair changtlung tak an buatsaih thei chu chhuanawm a ti a. Lengpui airport leh Aizawl khawpui hmun lailia Gandhi lim dahna hmunah ah pangpar huan mawi taka an enkawl chu lawmawm a tih thu sawiin Pi Renu Sharma chuan MFA te chu Mizoam hmel timawitu an ni, a ti a, an hmalakna zel turah duhsakna a hlan a ni.

Mizoram Florist Association hi kum 1997 November 11 khan a ding tan a. Pangpar chingtuten eizawnna bul ber atan leh sum hnar rintlak atan an hman theih nan kawng hrang hrangin hma an la thin a. Aizawl ah Headquarters neiin tunah chuan Mizoram khawpui hmun hrang hrang ah branch eng emaw zat an inzar pharh tawh a ni. Kum 1999 atang khan kum tin Flower Show/Florist Fair hi buatsaih tanin kum khatah vawi hnih vawi thum te neih a ni thin a. Hengah hian Mizoram sawrkar Horticulture department pawhin sum leh paia tanpuina te a pe bawk thin a. Tun tum hi a vawi 42 na niin stall 101 hawn a ni a. Heng ah te hian pangpar leh plant chi hrang hrang pho chhuah leh zawrh a ni.