Vawiin khan New Capital Complex, Aizawl ah  Pu Lalnunmawia Chuaungo, Chief Secretary chuan  'Hazard Risk & Vulnerability Analysis of 8 District Headquarters ' (HRVA) leh  'Digital 3-D Terrain Mapping & Modelling' (DTM) te a tlangzarh.

Mizoram District headquarter hrang hranga khuarel chhiatna thlen theihna hmun te Remote Sensing hmangin zirchian a ni a, a in ven dan leh mipute a nghawng theih dan HRVA ah hian tarlan a ni.  Mizoram leilung pianzia leh hmelhmang te zirchianna te chu DTM ah hian tarlan a ni bawk a ni.

Mizoram Remote Sensing Application Centre (MIRSAC) in a buatsaih Hazard Risk & Vulnerability Analysis of 8 District Headquarters' (HRVA) leh 'Digital 3-D Terrain Mapping & Modelling' (DTM) tlangzarhna ah hian Pu Lalnunmawia Chuaungo, Chief Secretary chuan tunlai thiamna hmanga Mizoram leilung zirchianna hlawhtling taka buatsaih a ni chu lawmawm a tih thu a sawi a ni. DTM chu hmasawnna hna hrang hrang, a bikin inkalpawhna kawngpui siam nan leh ram pianzia mila hmalakna tur hrang hrang atan a tangkai dawn a ni a ti a. HRVA chu chhiatrupna laka invenna leh chhanchhuahna hna thawktu  sawrkar department hrang hrangte leh NGO te tan a pawimawh hle  dawn a ni a ti. Chief Secretary chuan MIRSAC buatsaih heng Atlas pawimawh tak tak te hi tangkai taka hmang turin department hrang hrangte a chah nghal a ni.

He hun hi Dr.C.Vanlalramsanga, Secretary, Planning and Programme Implementation Department in a kaihhruai a, sawrkar department hrang hrang hotute an tel a ni.