Road & Infrastructure Development Board chuan vawiin khan an Chairman, Chief Minister Pu Zoramthanga hovin CM Cabinet Meeting Room-ah a vawikhatna atan an thukhawm. Er. H. Lalzirliana, MLA chu he Board ah hian Vice-Chairman niin, PWD Secretary, Additional Chief Secretary to CM Pu J.C. Ramthanga chu member-secretary a ni.

He meeting-ah hian Board hmalak dan tur ruangam sawi hovin, Chief Minister chuan hnathawh vil leh enzui (monitoring) ngaihpawimawh tul a tih thu a sawi. Kawng chu hmasawnna hnukpui a nih avanga hmasawnna ruangam dangte din hlawhtling tur chuan inkalpawhna kawng tha neih hmasak a tul thu Chief Minister chuan a sawi a. Ruah tui hul veleh kawng khuar hnawhkhat leh tihmam ngai laite tih mam hna, Patching chu thawh thuai a nih tur thu a sawi.

Vawiin meeting-ah hian kawng thar siam leh maintenance te leh, kawng bakah infrastructure asset dang mamawh din turte leh funding source te thlithlai a, project siamin, hna thawh hnu ah pawh mumal taka enzui chu board kut a nih thu te sawi a ni.

He meeting-ah hian State Planning Board Vice Chairman Pu H. Rammawi, Adviser to CM Pu C. Lalramzauva leh Board member dangte an tel a. Road & Infrastructure Development Board ah hian Finance Department Secretary, Planning & Programme Implementation Department Secretary, Urban Development & Poverty Implementation Department Secretary, PWD E-in-C, AMC Mayor, UD&PA Director leh mimal paruk member a ruat an ni.