Vawiin khan Mizoram Kailawn, 2019 chu Mizoram Sawrkar Chief Secretary Pu Lalnunmawia Chuango, Mizoram State Entrepreneurship Development Monitoring Committee (MEDMOC) Chairman ni bawk chuan Aijal Club-a programme buatsaihah a hawng.

Chief Secretary chuan Mizoram Sawrkar leh IIM Calcutta Innovation Park te thawhdunna fakin an hmalakna avangin Mizoramin entrepreneurship leh sumdawnna kawngah hma kan sawn nasa hle a ni, a ti. Mizo thalaite zingah entrepreneurship lama tui tak tak, mahni tui zawng hmanga eizawn tum, mi tum ruh leh beiseiawm tam tak a hmu chu lawmawm a tih thu Pu Lalnunmawia Chuaungo chuan a sawi a. Entrepreneurship hmasawnna tura boruak siam thiam a, thalaite tana kawng buatsaih hi ram sum leh pai dinhmun hmasawnna tur leh thalai hna hmulo te tana hna siam sak tura thil pawimawh leh tangkai a ni, a ti. Chief Secretary chuan hlawhtling turin lehkha thiam chungchuang nih chu thil pawimawh ber a ni lo tiin sumdawnna thinlung pua mahni thiam zawng leh tui zawnga eizawnna kawng dap thiam te, taimak, dawhtheih leh teirei peihte chu hlawhtlinna kawng zawhna atana thil pawimawh a ni zawk, a ti a. Hlawhchham hlau lo tur leh beidawng lo tura thalaite fuihin a tira hlawhchhamna anga lang pawh hlawhtlinna kawng inhawnna pawimawh tak a ni thei zawk tih hre turin a chah a ni.

Planning Secretary leh MEDMOC-a Alternate Chairman ni bawk Dr. C.Vanlalramsanga chuan Mizoram Kailawn tum thumna hawn tak chu tha lehzuala kalpui tum a ni, a ti a. Mizoram Kailawn, Mizoram Rahbi leh Leitlangpui Rahbi te kaltlangin kum nga chhungin entreprenuers bul tan mek 1000 te hrual hman tum a nih thu a sawi. Mizoram Kailawn 2017 leh Mizoram Kailawn 2018 ah diltu mi 620 chuang an awm thu leh chung zinga mi 83 te chu boot-camp a tel tura thlanchhuah an nih thu a sawi a. Mizoram Kailawn tum thumna ah hian District hrang hrangah leh zirna inah te outreach neih tum a nih thu leh boot-camp leh pitching competition pawh district level-a buatsaih tum a nih thu a sawi bawk.

Vawiin programme ah hian IIM Calcutta Innovation Park CEO Dr.Subhrangshu Sanyal in thu a sawi bawk a. Ani bakah hian Mizoram Kailawn 2017 leh Mizoram Kailawn 2018 a finalist mi pali - Lalnunsiami Pachuau (SIAMI X SIAMI), Lalramsanga (Zircon Enterprise), Lalhmachhuani (SUDS Handmade Soap) leh Alan Lalrinawma (Mizo Dance Camp) ten thu an sawi. MIZOFED Managing Director Pu Rinzuala kaihhruaiin Pu Lalhruaizela Fanai, NEDFi; Pu B.Lalrinkima, TATA TRUSTS; Pu Lalhruaitluanga, EDS Master Trainer leh Dr Vanramhlimpuii, ZONU ten panel discussion an nei bawk a ni.