Vawiin khan Kolasib DIPRO Conference Hall ah Kolasib Bawrhsap leh Education Department hmalakna in kolasib District a zirlai naupang ten zirna kawnga hma an sawn theihna tur kawng hrang hrang sawihona hun hman a ni.

Kolasib Bawrhsap Pu Zoengsanga chuan khawtlang nun chu vei awm a tih thu a tarlang a, khawtlang nun hrisel, nuam leh felfai ni tur chuan a bulthut atanga zirna mumal leh awmze nei kalpui a pawimawh ani tiin Kolasib District huam chhunga zirlai naupang ten zirna kawnga hma an sawn theihnan zirlai nu leh pa, zirtirtu bakah khawtlang hruaitute thawhona a pawimawh hle ani a ti. Zirtirtu ten mawhphurna sang tak an nei ani tiin mahni zirlai naupang te chu eng ang mize pu nge an nih, an chakna lai leh chak lohna lai te, an tui zawngte zir/zawh peih a ngai ani tiin kan zirlai naupang te chu mi puitling mi hmantlak ah kan chher chhuak tur ani a ti a, Nu leh Pa te leh khawtlang hruaitute pawhin zirlai naupangte chu khawtlang thil tih na a tel tir tamlo a, zirna a tan hun thawl pek thiam a ngaih thu sawiin nu leh pa ten kan fate zirna kawngah kan tuipuia kan telpui a ngai ani a ti.

Bawrhsap chuan Village Education Committee emaw education forum din tha a tih thu tarlangin hemi kal tlang hian khawtlang hruaitute leh nu leh pa ten zirna kawngah awareness nei thin se zirtirtu te chu a tam thei ang bera thawhpui (back-up) a ngaih thu a sawi bawk.

He hunah hian zirtirtu aiawh leh khawtlang aiawh ten zirna kawnga an hnufumna te, harsatna an tawh te bakah hmalak a ngaihna lai te sawihona hun an hmang a, zirlai naupangte chu a tam thei ang bera fuih leh kawng dik kawh hmuh bakah zirtirtu lam pawh tan leh zual sauh a pawimawh thu te tarlan a ni a, khawtlang hruaitute pawhin zirlai leh zirtirtu te chu kawng hrang hranga tan lakpui a pawimawh zia sawilan bawk ani. Sawihona atanga kawng hrang hranga hmalakna awm te chuan pen khat tala hmasawnna a thlen beisei  anih thu tarlan ani a chung te thlirho leh tur chuan second term exam zawhah sawihona hun ruahman leh nise tia thutlukna siam bawk a ni.

He hunah hian Kolasib Town Area a middle leh high sikul headmaster te, Govt. Kolasib College Principal, St.John’s HSS Principal, Sub-Hqrs YMA, Sub Hqrs MUP, Sub Hqrs MHIP, Joint VC hruaitute bakah MJA member te an kalkhawm a ni.