1156/2026-2027

Dated Aizawl, the 24th June, 2026: Vawiin khan Mizoram Youth Commission (MYC) chuan Drishti IAS coaching institute nena tangkawpa an buatsaih 'Free UPSC Coaching Programme' chu MYC Auditorium, MINECO, Khatla-ah hawn a ni a. Chief Secretary Pu Khilli Ram Meena chuan khuallian niin Coaching programme hi a hawng a ni.

He hunah hian khuallian Pu Khilli Ram Meena chuan thu sawiin, March 2025-a Union Home Minister Pu Amit Shah-in Mizoram a rawn tlawh khan, Mizoram-in harsatna hrang hrang a tawh mekte chu sawi ho turin Mizoram-a Civil Society Organisation-te nen an inkawm a ni tih a sawi a. Chumi inkawmhona atang chuan Mizoram atanga IAS tling hnuhnung ber pawh kum 2014-a tling niin, Mizoram atanga All India leh Central Civil Services-a inziak tling an tlem hle tih a lang chhuak a. He thu hi ngai pawimawhin State official-te chuan ngaihtuahna leh sawihona an neih hnuah tuna Free UPSC Coaching Programme hi an duang chhuak a, India rama Coaching Institute hlun leh changtlung berte zinga mi Drishti IAS, New Delhi chu thlan a ni, a ti.

Zirlaite fuihin, Chief Secretary(CS) chuan hlawhtling tur hian rim taka thawh loh chu kawng dang a awm lo tih a sawi a; chuvangin zirlaiten coaching-a zirtirtute puihna rinchhana thahnemngai taka thawk tur leh an elpuite (competitors) umpha reng tura eng lai pawha theihtawp chhuah reng turin leh an rilrua hlawhtling tura tuihalna chu awm tir reng turin a chah a ni. Hemi bakah hian CS chuan coaching programme leh zirlaite tan an mamawh apiangah pui turin Mizoram Sawrkar chu inpeih reng a ni tih sawiin, zirlaite chu thil dang ngaihtuah buai lovin an theihtawp chhuah turin a chah bawk a ni.

MYC Chairman Pu Malsawmzuala Ralte pawhin thu sawiin, Mizoram-ah hian Central Civil Services exam-a hlawhtlinna thlen tumin Kohhran, Sawrkar leh khawtlang mipuite chuan an theihtawp chhuah mahse hlawhtlinna chang tur chuan mimal tumna leh thawh rimna a pawimawh a ti a. Zirlaite chu an vanneihzia hrilhin he coaching programme hi hmang tangkai a, an theih tawp chhuah turin a fuih a, an kal zelna tur atan duhsakna a hlan bawk a ni.

Keynote address sawiin MYC Secretary Pi V. Lalmuanpuii chuan Mizo thalai tam tak chuan State pawn lamah zirnan sum leh thil mamawh dang an neih tawk loh avangin Central Civil Services-a an luh tumna chu an bansan fo thin a ti a. Thalaite ah investment siam hi investment tha ber a ni tih hre reng chungin, Chief Secretary leh LESDE Department official-te kaihhruaina hnuaiah, he programme hi thalaite kawng hawnsak tura ruahman a ni, a ti.

He hunah hian Drishti IAS Associate Vice-President Pu Georgi Mathan Ninan pawhin thu sawiin, Mizo khawtlang chuan 'Tlawmngaihna' ang civil servant te tana mizia hlu tak tak an vawng a ti a. Drishti IAS chuan zirlaite chu Central Services an luh ngei a, Mizo nun ze mawi chu khawvel hmun hrang hranga an thehlar theih nan theihtawp an chhuah tur thu a sawi bawk.

Vawiin coaching programme hawnna inkhawm hi MYC-a zirtirtu Pu Lalremruata Tuallawt in kaihruaiin kalkhawmte lawmna thu a sawi bawk a. MYC Under Secretary Pi Lalramdini'n lawmthu sawina in hun hi a khar a. LESDE Secretary Dr. Lalhriatzuali Ralte, LESDE Director Pi Pinky Zosangpuii, Drishti IAS-a Chief Content Creator Pu Neel Parmar, Drishti IAS-a zirtirtu Pu Vivek Kaushik te bakah MYC official dangte an tel bawk a ni.

FREE UPSC COACHING PROGRAMME CHANCHIN TLANGPUI:

UPSC hnuaia Civil Services Examination-ah Mizo thalaite an luh hnem lehzual theihna turin, Mizoram Sawrkar chuan Mizoram Youth Commission kaltlangin thla 12 chhung a thlawna UPSC Coaching kalpui tura ruahmanna thar a siam a.

Hemi atan hian India rama Coaching Institute hlun leh changtlung berte zinga mi Drishti IAS, New Delhi nen thawhdunna thuthlung an ziak a ni. Uluk taka screening process neih a nih hnuah UPSC aspirant 100 thlan chhuah an ni a, he coaching program hnuaia class-te hi 24th March 2026, atang khan kal tan a ni.

He programme hnuaiah hian General Studies class chu offline-in neih a ni a, Optional subject paruk -Political Science & International Relations, Geography, Sociology, Anthropology, History leh Public Administration chu online-in zirtir a ni bawk. Hemi bakah hian, Aizawl pawna mi zirlaite tan hostel facility pawh siam a ni.