2891/2023-2024

Aizawl, the 30th November 30, 2023: Vawiin chawhnu dar 1 khan Chief Secretary Dr Renu Sharma chuan MIZORAM SAVATE (Mizoram Birds Illustrated) tih lehkhabu, Lalram Thanga leh Lalmalsawme (fam) te ziah chu Chief Wildlife Warden Conference Hall, New Secretariat Complex, Khatla-ah a tlangzarh.

He lehkhabuah hian Mizorama sava chi hrang 275, a lem nena an ziah a awm a ni.  Mizorama sava zirna hmasa ber neih a nih dan te, sava hriat chian leh chhinchhiah dante leh sava zir turin tih tur leh tih theihte tarlan a ni.

Chief Secretary chuan hetianga lehkhabu hlu tak, Mizo tawng ngeia ziak a ni hi lawmawm a ti a, nungcha humhalh kawngah mipui zirtira kaihruaitu pawimawh tak a nih a beisei thu a sawi.

Lehkhabu tlangzarh rual hian Lalram Thanga kutchhuak sava leh ramsa lem thinga ker 50 chuang pho chhuah chu  Pu RS Sinha,  PCCF/Principal Secretary, EF&CC Department chuan  kalkhawmte en turin a khuh hawng nghal bawk. PCCF chuan thu sawiin thinga milem ker hi Mizote thiam zawng tak a nih a thu sawi a, kan ram rohlu tak tak nungcha leh sava te, mipui hmuh theiha phochhuah fo a pawimawh a ni, a ti a, zirlai leh thangtharte tan chona tha tak a ni a ti.

Pu Lalram Thanga pawhin an lehkhabu siam dan chungchang sawiin a thianpa Pu Lalmalsawma’n an zawh hma a a boralsan thut avanga harsatna an tawh dante a sawi a, Mizo mipuiten Mizoram sava hming mahni tawng mai baka a sâp hming tlanglawn leh scientific hming thlenga an sawi theih nana buatsaih an nih thu a sawi. Lehkhabu hi ramhnuai (field)-a sava zir mite tanpuitu (guide) ang tura an duan a ni tih a sawi.

Thinga milem ker hi tui vanga a hun awla tuk thin (hobby) a nih thu a sawi. Milem 50 chuang, size hrang hrang entir a ni a. He Wildlife Wood Curving Exhibition hi naktuk December 1 (Friday) thleng hian Chief Wildlife Warden Office Building-ah a duh apiangte chhim theih turin neih chhunzawm a ni ang.