2892/2023-2024

2023 Sahmulphah thla ni 30: Vawiin chawhma khan November ni 7, 2023-a Mizoram Legislative Assembly Inthlanpui, 2023 buatsaiha Kolasib District chhunga assembly bial pathuma vote tlate chhiar tura ruat, counting supervisor-te leh counting assistant-te tan DC Conference Hall, Kolasib-ah training thawh hnihna buatsaih a ni.

He training hi Kolasib District Election Officer Pu John LT Sanga chuan hawngin, District Election Office chu vote chhiar turin a inpuahchah fel thawkhat tawh tih a sawi a. Vote chhiar chu inthlan hmawr bawkna leh a hlawhtlinna lan chhuahna a nih angin, counting official atana ruatte chu an mawhphurhnate ṭha taka hlen chhuak turin a chah a ni.

He hunah hian State Level Master Trainer Pu Lalremruata Sailo, Sub-Divisional Officer (Civil), Vairengte chuan inthlan vote chhiar dan kalphung leh vote chhiarnaa hriat tur pawimawh hrang hrang a zirtir a. EVM-a vote tla chhiar dan leh form dah khah dan a taka enchhin niin, zawhna leh chhanna leh sawi hona hun hman a ni bawk.

He hun hi Kolasib District chhunga assembly bial pathum - 4-Tuirial, 5-Kolasib leh 6-Serlui biala Returning Officer-te, Election Officer leh Assistant Returning Officer te pawhin an hmanpui a ni.

MLA Inthlanpui 2023-a Kolasib District chhunga assembly bial pathuma vote tlate hi December ni 3, 2023 (Pathianni) zing dar 8:00 aṭangin Government Kolasib College-a counting hall pathumah chhiar a ni dawn a. Bial tin tan counting hall hran ṭheuh ruahman niin, counting hall tinah hian EVM-a vote tlate chhiarna tur dawhkan 10 ṭheuh bakah, postal ballot vote tlate chhiarna tur dawhkan 1 ṭheuh a awm dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni.