16/2022-2023
Dated Serchhip, the 1st April, 2022: Vawiin khan Mizoram Chief Secretary Dr. Renu Sharma, IAS chuan Thenzawla AH & Vety Farm a tlawha, an hmalakna hrang hrangte a enpui.
Dr. Renu Sharma hian Kel vulhpunna hmun tlawh hmasa berin an hnathawh dan tlangpuite thawktute a titi puia. He Kel an enkawl mekte hi kum 2019 atanga bul an tan niin, Rajasthan leh Punjab atanga an lakluhte an ni. Heta tanga Kel no lo piangte hi Kel vulhtute hnenah vulhpun zel tura hralh leh thin an ni a, vawiin thlengin Kel pa 49 leh a nu 46 an hralh tawh a, tunah hian enkawl lai Kel puitling Sirohi Kel 15, Beetal Kel 89 leh Kel no 25 an nei mek a ni. He Kel vulhpunna hmun hi RIDF NABARD sum Rs. 600 lakh senga bul tan a ni. Kel vulhpunna a tlawh hnu hian Ranchaw chinna te, Dil pui leh Sakawr enkawlna hmunte a tlawh leh bawk.
Dr. Renu Sharma chuan Thenzawlah AH & Vety department ten ram zau, nuam leh mawi tak an nei chu lawmawm a tih thu a sawi a. An enkawl dan felfai leh thianghlim tak chu fakin tihhmasawn zel theihna tam tak a la awm nia a hriat thu a tarlang a. He farm in hma a sawna hmalakna zau zawk a awm theih nan Department Secretary a titipui tur thu a sawi bawk a ni.
Chief Secretary hi Pu H. Zorintluanga, OSD to CS in a tawiawm a, Thenzawlah hian Pi Nazuk Kumar, IAS, Serchhip DC leh Pu Pryank Kishore, IAS, SDO, Thenzawl ten lo dawngsawngin, Farm ah hian Dr. PC Lalsangzuala, General Manager, Dr. Lalramdintluanga, Manager leh Dr. Lalmuanpuia Samte ten an lo dawngsawng a ni.
Attachment
- Loading attachment...
