No.4329/2021-2022
Aizawl 19th March, 2022: Zankhat riaka Khawzawl tlawh, Pi Renu Sharma IAS, Chief Secretary, Government of Mizoram chuan vawiin khan Khawzawla Sawrkar hmalakna hrang hrangte a tlawh a, sawrkar department hotute kawmna hun neiin sawrkar hnathawkte chu mipui rawngbawlna (public service) rilru pu chunga hna thawk thin turin a fuih a ni.

Vawiin chawhma dar 10:00 a DC Conference Hall-a Khawzawl District chhunga sawrkar hnathawk hotu (Head of Office) te meeting a neihpuinaah Chief Secretary chuan Mizoramah  tum thum a awm tawh tih sawiin, Department pawimawh tak tak - Finance, GAD, Home leh DP&AR ah te a awm thin avangin Mizoram leh sawrkar hnathawkte kalphung a hrechiang tih a sawi a. Khawzawl District-a sawrkar hnathawkte chu DC kaihhruaina hnuaiah thahnemngai taka an thawh tawhnaah fakin, mipui rawngbawlna rilru pu chunga hna thawk a, an an hnathawhna hmunah a tha zawnga danglamna thlentu ni thin turin a fuih a ni.

China leh Europe ram thenkhatah Covid-19 hri thar a hluar leh mek tawh avangin India sawrkar pawhin State tinte fimkhur turin a chah thar leh tawh tih CS chuan a tarlang a. Khawzawl District-a Office, Zirna in leh mipui vantlang khawsakna hmunahte Covid Appropriate Behaviour zawm tha sauh sauh thin turin a chah nghal a ni.

Chief Secretary Pi Renu Sharma hova meeting-ah hian Khawzawl District Bawrhsap Pu C.C. Lalchhuangkima chuan powerpoint presentation hmangin District dinhmun (profile) tlangpui bakah Sawrkar Project langsar zual thenkhat - Vankal Solar Park, Tualte Tomato chin, nizung chakna hmanga tui pump (Solar Water Pumps), PMGSY kawng laih, BPL Free Villages, Kawlkulha Dragon Fruit chin mek te bakah Myanmar raltlan leh African Swine Fever dinhmunte a tarlang a. Khawzawl District-a Tourism chawilar kawnga theihna awm hrang hrangte a tarlang bawk.

Pu PC Lalchunglura, Superintendent of Police in Police Department hmalakna leh mamawh hrang hrangte tarlangin, Dr. Albert Lalhminghlua, District Medical Superintendent cum Chief Medical Officer in PPT presentation hmangin District chhunga damdawiin hrang hrang leh Covid-19 dinhmunte a tarlang bawk a ni.

Khawzawl District Headquarters chhunga Sawrkar hmalakna hrang hrangte pawh Chief Secretary hian a tlawh a. Darngawn venga Mualvawm field leh pavilion sak mek te, Dinthar venga DC Office Complex leh DRDA Office tur sak mek te, Hermon venga District Hospital leh CMO Office building sak mek te leh Peng pui, Darngawna Solid Waste Management Centre sak mek te a tlawh a. Heng bakah hian Dinthar venga SP Office leh KVK, Kawnzara Cold Storage bunte pawh a tlawh bawk.

Chief Secretary hi District Bawrhsap leh SP bakah DC Office-a officer ten tawiawmin, a tlawhna hmunah Department hotute leh Contractor ten an lo dawngsawng zel a ni.